ដោយ៖ប៉ែន សុផល
បាត់ដំបង៖ក្រុមឈ្មួញនាំចូលទំនិញគេចពន្ធតាមច្រកអូររំដួលបានត្អូញត្អែរចំពោះរបររកស៊ីរបស់ខ្លួនមិនសូវសូវសមប្រកបព្រោះតែបង់លុយអោយគយនិងស្ថាប័នផ្សេងៗទៀតច្រើនស្ថាប័ន។
ឈ្មួញអ្នករកស៊ីនាំចូលទំនិញគេចពន្ធតាមច្រកអូររំដួល ស្រុកភ្នំព្រឹក ខេត្តបាត់ដំបងកាលពីថ្ងៃទី២០ ខែវិច្ឆកា ឆ្នាំ២០១៦កន្លងមកនេះបានលើកឡើងថា ក្នុងការនាំចូលទំនិញគ្រប់ប្រភេទនៅពេលបច្ចុប្បន្ននេះមិនសូវសមប្រកបទេព្រោះត្រូវបង់លុយសុទ្ធមិនមានចេញវិក័យបត្រ័ឬកន្ទុយសន្លឺកដែលបង់តាមតារាងកំណត់របស់រដ្ឋឡើយ ពិសេសការបង់អោយមន្ដ្រីគយនិងរដ្ឋាករចាប់ពី៥ម៉ឺនរៀលទៅ៧ម៉ឺនរៀលតាមប្រភេទទំនិញគិតក្នុងឡានមួយគ្រឿងដោយត្រូវរំដោះទំនិញតាមរទេះអូសជិត១០រទេះទើបពេញមួយឡានដឹកទំនិញខ្នាតតូច ក្រៅពីនេះនិងត្រូវបង់ពន្ធអោយគយក្នុងខេត្តផងដែរ។
ទំនិញដែលបាននាំចូលខាងលើនេះមានជី ទឹកក្រូចគ្រប់ប្រភេទ ទឹកសុទ្ធ នំធុងនិងទំនិញជាច្រើនប្រភេទផ្សេងៗទៀតដោយនាំចូលផ្គត់ផ្គង់លើទីផ្សារក្នុងស្រុកនានាដូចជាទីផ្សារស្រុកបវេល ទីផ្សារក្នុងក្រុងបាត់ដំបងនិងបណ្តាស្រុកជាប់គ្នាជាច្រើនទៀត។
ប្រភពមួយផ្សេងទៀតបានបង្ហើបអោយដឹងបន្ដរថា ទំនិញច្រើនមុខមានឈ្មួញជាច្រើនបាននាំចេញពីប្រទេសថៃកាត់តាមច្រកអូររំដួលចាប់ពីពេលព្រឹកព្រលឹមដល់ម៉ោងប្រមាណជាង១០.០០ព្រឹកនិងនៅពេលរសៀលចាប់ម៉ោង១.០០ដល់ម៉ោងជាង៦.០០ព្រលប់ៗ។ ការនាំចូលទំនិញក្រោមរូបភាពត្រូវរូវគ្នានេះបានធ្វើអោយបាត់ចំណូលថវិកាជាតិជាច្រើនព្រមទាំងប៉ះពាល់ខ្លាំងផងដែរទៅដល់ក្រុមហ៊ុនទទួលសិទ្ធផ្ដាច់មុខមិនអាចទប់ទល់បាននិងការលួចលាក់នាំចូលខុសច្បាប់ពិសេសការប្រកួតប្រជែងទាក់ទងនិងតម្លៃក្នុងទីផ្សារ។
ទាក់ទងនឹងបញ្ហាជួបការលំបាកនិងការត្អូញត្អែរខាងលើនេះអ្នកយកព័ត៌មានយើងមិនអាចសុំការបំភ្លឺពីលោក យ៉ែម ខែមរ៉ាត់ ប្រធានការិយាល័យគយនិងរដ្ឋាករច្រកអូររំដួលបានទេព្រោះទូរសព្ទ័ចុចមិនចូល រីឯលោកអៀង ផេង អនុប្រធានសាខាគយខេត្តបាត់ដំបងប្រាប់ថា ជាប់រវល់នៅភ្នំពេញមានកិច្ចការងារអ្វីចាំលោកត្រឡប់មកវិញជួបគ្នា៕
