រាជធានីភ្នំពេញ៖ប្រធានក្រុមមតិភាគតិច និងជាប្រធានស្តីទីគណបក្សសង្គ្រោះជាតិ លោក កឹម សុខា បានអញ្ជើញចូលប្រជុំសភាពេញអង្គឡើងវិញនៅព្រឹកថ្ងៃទី០៧ ខែធ្នូ ឆ្នាំ២០១៦នេះ បន្ទាប់ពីទទួលបានការលើកលែងទោសពីព្រះមហាក្សត្រនាពេលថ្មីៗនេះ។
ការចូលប្រជុំពេញអង្គរបស់ លោក កឹម សុខា ពេលនេះគឺជាលើកដំបូងហើយ បន្ទាប់ពីលោកត្រូវបានរដ្ឋសភាបោះឆ្នោត ទម្លាក់ចេញតំណែងពីអនុប្រធានទី១ នៃរដ្ឋសភា កាលពីចុងខែតុលា ឆ្នាំ២០១៥កន្លងមក ហើយនៅយប់មិញនេះត្រូវបានរដ្ឋសភា ប្រកាសទទួលស្គាល់ជាប្រធានក្រុមមតិភាគតិច ដែលនេះជាតំណែងរបស់លោក សម រង្ស៊ីកាលពីមុន។
គួរបញ្ជាក់ថា កិច្ចប្រជុំសភាពេញអង្គនៅព្រឹកថ្ងៃទី០៧ ខែធ្នូនេះ គឺបោះឆ្នោតអនុម័តចំពោះការដាក់បេក្ខភាព លោក សួន រីដា ជំនួសតំណែងតំណាងរាស្ត្ររបស់ លោក ប៉ែន សុវណ្ណ ដែលមកពីគណបក្សសង្គ្រោះជាតិ ដែលបានទទួលមរណភាព៕
