ភ្នំពេញ៖នៅក្នុងដំណើរទស្សនកិច្ចនាពេលខាងមុខទៅចូលរួមវេទិកាសេដ្ឋកិច្ចពិភពលោក (WEF) នៅទីក្រុងដាវ៉ូសប្រទេសស្វ៊ីស សម្តេច អគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា នឹងផ្តោតសំខាន់លើរបៀបវារៈ អំពីសមាហរណកម្មអាស៊ាននិងសករាជថ្មីនៃកំណើននិងឱកាសសម្រាប់ប្រទេសកម្ពុជា។
IBC បានផ្សាយថា សម្តេចនាយករដ្ឋមន្ត្រីនឹងចូលរួមពិភាក្សាក្នុងតុគណប្រតិភូ ជាមួយនឹង លោក ម៉ូហាម៉ាត់ ណាជីបប៊ិនទុនអាប់ឌុលរ៉ាហ្សាក់នាយករដ្ឋមន្ត្រីនិងជារដ្ឋមន្ត្រីក្រសួងហិរញ្ញវត្ថុប្រទេសម៉ាឡេស៊ី លោក ផាំ ប៊ិញ មិញឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាមនិង លោក ព្រិទ្ធយ៉ាថន ទេវកុល ឧបនាយករដ្ឋមន្ត្រីថៃ។
សម្តេចនាយករដ្ឋមន្ត្រីនិងឯកឧត្តមទេសរដ្ឋមន្ត្រី ស៊ុន ចាន់ថុលនឹងថ្លែងសុន្ទរកថា នៅឱកាសកម្មវិធីភោជនាហារថ្ងៃត្រង់ ដែលរៀបចំដោយសភាពាណិជ្ជកម្មអន្តរជាតិនៃកម្ពុជា (IBC) និងសភាពាណិជ្ជកម្មស្វ៊ីស-អាស៊ីដែលជាវេទិកាសម្រាប់អ្នកដឹកនាំវិស័យឯកជនប្រទេសស្វ៊ីស នាយកប្រតិបត្តិក្រុមហ៊ុន និងប្រតិភូចូលរួមវេទិកាសេដ្ឋកិច្ចពិភពលោកពិភាក្សាអំពីឱកាសអាជីវកម្មនិងការវិនិយោគនៅកម្ពុជា។
សភាពាណិជ្ជកម្មអន្តរជាតិនៃកម្ពុជា តែងតែបានគាំទ្ររដ្ឋាភិបាលកម្ពុជានៅក្នុងការចូលរួមជាមួយវេទិកាសេដ្ឋកិច្ចពិភពលោក និងតែងបានចូលរួមយ៉ាងសកម្មជាមួយនឹងរដ្ឋាភិបាលក្នុងកិច្ចប្រជុំរបស់វេទិកាសេដ្ឋកិច្ចពិភពលោកនៅកម្រិតតំបន់អាស៊ី។
នេះជាលើកទីមួយហើយ ដែលថ្នាក់ដឺកនាំកំពួល និង ជាន់ខ្ពស់របស់ប្រទេសកម្ពុជាមានសមាសភាពនៅក្នុងវេទិកាសេដ្ឋកិច្ចពិភពលោក នៅទីក្រុងដាវ៉ូស ដែលជាកិច្ចប្រជុំដ៏សំខាន់មួយសម្រាប់មេដឹកនាំផ្នែកពាណិជ្ជកម្មនិងនយោបាយទូទាំងពិភពលោក។
សម្តេចតេជោនាយករដ្ឋមន្ត្រីនឹងមានវត្តមានអមដំណើរដោយឯកឧត្តមស៊ុន ចាន់ថុលរដ្ឋមន្ត្រីក្រសួងពាណិជ្ជកម្មឯកឧត្តមបណ្ឌិតអូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុនិងឯកឧត្តមសុខ ចិន្តាសោភារដ្ឋមន្ត្រីអមនាយករដ្ឋមន្ត្រីនិងជាអគ្គលេខាធិការនៃក្រុមប្រឹក្សាអភិវឌ្ឍកម្ពុជា (កអក)។
គណៈប្រតិភូផ្នែកអាជីវកម្ម រួមមាន លោកបណ្ឌិតអ៊ិន ចាន់នីនាយកប្រតិបត្តិធនាគារអេស៊ីលីដាលោក Bretton Sciaroniប្រធានសភាពាណិជ្ជកម្មអន្តរជាតិនៃកម្ពុជា លោកPeter Sokប្រធានសហព័ន្ធអង្ករកម្ពុជា (CRF) និងលោក Pierre Tamiសហគ្រិនសង្គម និងជាសមាជិករបស់សភាពាណិជ្ជកម្មអន្តរជាតិនៃកម្ពុជានិងវេទិកាសេដ្ឋកិច្ចពិភពលោក។
លោក Tami ស្ថាបនិកអង្គការហាការនិងអាជីវកម្មមួយចំនួនទៀត នៅក្នុងប្រទេសកម្ពុជាគឺជាអតីតអ្នកទទួលពានរង្វាន់សហគ្រិនសង្គមពីមូលនិធិស្វ័ប(Schwab Foundation)ដែលបានប្រគល់ជូនក្នុងកិច្ចប្រជុំវេទិកាសេដ្ឋកិច្ចពិភពលោកទីក្រុងដាវ៉ូស។
លោកបណ្ឌិតអ៊ិន ចាន់នីដែលជាអនុប្រធានសភាពាណិជ្ជកម្មអន្តរជាតិនៃកម្ពុជាផងដែរនោះ ធ្លាប់ចូលរួមក្នុងវេទិកាសេដ្ឋកិច្ចពិភពលោកជាញឹកញយ រួមទាំងធ្លាប់ទទួលពានរង្វាន់ ក្នុងវេទិកាសេដ្ឋកិច្ចពិភពលោក ទីក្រុងម៉ានីលកាលពីខែឧសភា នៅពេលដែលធនាគារអេស៊ីលី ជាប់ឈ្មោះជាក្រុមហ៊ុនមួយក្នុងចំណោមក្រុមហ៊ុនកំណើនសកលទាំង ២០ នៅក្នុងតំបន់អាស៊ី។ ការទទួលស្គាល់នេះ ផ្តល់ឲ្យដល់ក្រុមហ៊ុនណា ដែលសម្រេចបានកំណើនប្រាក់ចំណូលខ្ពស់ខ្លាំងលើសគេក្នុងវិស័យ អនុវត្តន៍អាជីវកម្មប្រកបដោយភាពច្នៃប្រឌិតនិងមានទំនួលខុសត្រូវខ្ពស់។
លោកបណ្ឌិតអ៊ិន ចាន់នី បានមានប្រសាសន៍ថា “វេទិកាសេដ្ឋកិច្ចពិភពលោកគឺជាព្រឹត្តិការណ៍កម្រិតខ្ពស់ដ៏សំខាន់មួយ ហើយព្រឹត្តិការណ៍នៅទីក្រុងដាវ៉ូសនេះ គឺជាឱកាសផ្សារភ្ជាប់បណ្តាញទំនាក់ទំនងបានល្អបំផុត។ នេះជាកិត្តិយសដ៏ធំធេងណាស់សម្រាប់ខ្ញុំ ដែលបានចូលរួមជាផ្នែកមួយនៃគណៈប្រតិភូកម្រិតខ្ពស់នេះដែលដឹកនាំជាលើកដំបូងដោយសម្តេចនាយករដ្ឋមន្ត្រី។ ហើយខ្ញុំជឿជាក់ថា សមាសភាពដ៏ខ្ពង់ខ្ពស់នៃគណៈប្រតិភូនេះ នឹងលើកមុខមាត់ប្រទេសកម្ពុជានៅឆាកសេដ្ឋកិច្ចពិភពលោក ជាក់ជាមិនខាន”។
លោក Sciaroni បានមានប្រសាសន៍ថា “ប្រធានបទនៃការពិភាក្សារបស់សម្តេចនាយករដ្ឋមន្ត្រីគឺសមាហរណកម្មអាស៊ានដែលជាប្រធានបទដែលសម្តេចបានលើកឡើងក្នុងសន្និសីទរបស់សភាពាណិជ្ជកម្មអន្តរជាតិនៃកម្ពុជា នៅរាជធានីភ្នំពេញកាលពីឆ្នាំមុនដែរ។ ដូច្នេះយើងរំពឹងថានឹងបន្តពិភាក្សាអំពីប្រធានបទដ៏សំខាន់នេះ នៅក្នុងប្រទេសស្វ៊ីសបន្ថែមទៀត ជាមួយបុគ្គលពាក់ព័ន្ធកាន់តែច្រើន។”
បន្ថែមពីលើពីកិច្ចការប្រជុំការពិភាក្សាជាក្រុម និងកម្មវិធីភោជនាហារថ្ងៃត្រង់ក្រុមប្រតិភូកម្ពុជាក៏នឹងជួយលើកកម្ពស់វិស័យនាំចេញអង្ករ នៅក្នុងអំឡុងដំណើរទស្សនកិច្ចនៅប្រទេសស្វ៊ីសនេះផងដែរ ដោយក្រុមគណៈប្រតិភូនឹងជួបជាមួយនាយកប្រតិបត្តិក្រុមហ៊ុននាំចូលនិងកែច្នៃអាហារធំៗនៅប្រទេសស្វ៊ីស ដើម្បីជួយលើកកម្ពស់អង្ករឈ្នះពានរង្វាន់របស់កម្ពុជា។
កាលពីខែវិច្ឆិកាឆ្នាំមុនអង្ករក្រអូបរំដួល របស់ប្រទេសកម្ពុជា បានជាប់ឈ្មោះជាអង្ករល្អបំផុតនៅលើពិភពលោក ដែលនេះជាជ័យជំនះបីឆ្នាំជាប់គ្នា នៅក្នុងកម្មវិធីពានរង្វាន់អង្ករពិភពលោក។
កិច្ចប្រជុំ និងទស្សនកិច្ច រៀបចំដោយសភាពាណិជកម្មអន្តរជាតិនៃកម្ពុជា នឹងជួយឲ្យសហព័ន្ធអង្ករកម្ពុជា កសាងបន្ថែមលើភាពជោគជ័យនេះនិងពង្រីកសក្តានុពលទីផ្សារមានតម្លៃ ថ្មីសម្រាប់ស្រូវអង្កររបស់ខ្លួន៕ IBC
