ដោយ៖ប៉ែន សុផល
បាត់ដំបង៖អាជ្ញាធររបស់ខេត្តបាត់ដំបងបានរៀបចំអតីតអគារសាលាខេត្តដែលមានអាយុ១១១ឆ្នាំអោយទៅជាសារះមន្ទីរដាក់អោយភ្ញៀវជាតិនិងអន្តរជាតិចូលទស្សនាកំសាន្ត។
ក្នុងពិធីក្រុងពាលីនៅព្រឹកថ្ងៃទី១៩ ខែធ្នូ ឆ្នាំ២០១៦នេះលោក ងួន រតនះ ប្រធានគណៈកម្មការខេត្តចាត់ចែងរៀបចំ អភិរក្សនិងថែទាំសារៈមន្ទីរសាលាខេត្តបាត់ដំបងបានអោយដឹងថា ដោយពិនិត្យឃើញកាលានុវត្តភាពនិងសារៈសំខាន់ពិសេសដើម្បីការកែរលំអរអោយមានសោភ័ណភាពថែមមួយកំរិតទៀតទើបអាជ្ញាធរខេត្តសម្រេចរៀបចំអតីតអគាររដ្ឋបាលសាលាខេត្តបាត់ដំបងចាស់ដែលនៅទំនេរជាសារៈមន្ទីរដោយស្វែងរកដៃគូរវិស័យឯកជនដើម្បីទ្រទ្រង់ ការពារ និងអភិរក្សអគារចំណាស់អាយុជាង១០០ឆ្នាំអោយបានគង់វង្សតទៅ។
លោក ងួន រតនះ បានបន្តថា អតីតអរគាសាលាខេត្តដែលមានអាយុកាលដ៏ចំណាស់ខាងលើនេះក្រៅពីគោលបំណងអភិរក្ស និងថែរទាំអោយបានគង់វង្សក៏មានគោលបំណងសំខាន់ផងដែរ សំដៅការទាក់ទាញភ្ញៀវទេសចរជាតិ អន្តរជាតិអោយចូលមកទស្សនាកម្សាន្តក្នុងខេត្តបាត់ដំបងអោយបានកាន់តែកើនឡើងថែមទៀតពីមួយឆ្នាំ ទៅឆ្នាំ។
យោងតាមសេចក្តីសម្រេចស្តីពីការបង្កើតគណៈកម្មការខេត្តរៀបចំ អភិរក្សថែទាំ និងគ្រប់គ្រងបានអោយដឹងថា ការរៀបចំសារះមន្ទីរជាបេតិកភ័ណរបស់ខេត្តនិងសម្រាប់អ្នកជំនាន់ក្រោយនេះ ផ្តោតយកចិត្តទុកដាក់លើការដាក់តាំងរូបភាព ទស្សនីយភាពផ្សេងៗដែលកើតឡើងក្នុងសម័យគ្រប់គ្រងដោយលោកម្ចាស់នីមួយៗរហូតដល់ឆ្នាំ១៩០៧ និងក្នុងសម័យអាណានិគមនិយមបារាំង ប្រវត្តិនៃការដឹកនាំខេត្តបាត់ដំបងនិងរូបថតអភិបាលខេត្តពីសម័យអាណានិគមនិយមបារាំងរហូតដល់បច្ចុប្បន្ន ក្រៅពីនេះរៀបចំដាក់តាំងនូវវត្ថុបុរាណ រូបចំលាក់ រូបភាពសិល្បះ បញ្ចូលសម្លេងនិងរូបភាពដោយរៀបរាប់ប្រវត្តិខ្លីៗតាមប្រវត្តិកាលនីមួយៗជាភាសាខ្មែរ អង់គ្លេសឬភាសាបារាំងផងដែរ។
គួរបញ្ជាក់ថា៖ ការសម្រេចចិត្តរបស់អាជ្ញាធរខេត្តបាត់ដំបងដាក់អតីតអគារសាលាខេត្តចាស់ដែលបានកសាងឡើងដោយសម័យលោកម្ចាស់កថា ថនឈុំកសាងក្នុងឆ្នាំ១៩០៥អោយក្លាយជាសម្បត្ដិបេតិកភ័ណសារមន្ទីរខេត្ត បន្ទាប់ពីអគាសាលាខេត្តថ្មីដំណើរការដាក់អោយប្រើប្រាស់ជាផ្លូវនៅឆ្នាំ២០០៥រហូតដល់ពេលបច្ចុប្បន្ននេះ៕
