ដោយ៖ប៉ែន សុផល
បាត់ដំបង៖សត្វព្រៃចំនួន៥៦៣ក្បាលត្រូវបានមន្ត្រីរដ្ឋបាលព្រៃឈើខេត្តសហការជាមួយកម្លាំងកងរាជអាវុធហត្ថស្រុកសង្កែចុះបង្ក្រាបបាននិងធ្វើការដុតកំទេចចោលកាលពីព្រឹកថ្ងៃទី២២ខែធ្នូ ឆ្នាំ២០១៦នេះ។
លោក ពិត ភារក្ស នាយរងខណ្ឌរដ្ឋបាលព្រៃឈើខេត្តបាត់ដំបងបានបញ្ជាក់អោយដឹងថា៖កាលពីថ្ងៃទី២១ ខែធ្នូឆ្នាំ២០១៦ដោយមានការដឹកនាំពីលោក ហេង លុយ ព្រះរាជអាជ្ញារងអមសាលាដំបូងខេត្តបាត់ដំបងកម្លាំងជំនាញខ័ណ្ឌរដ្ឋបាលព្រៃឈើបានសហការជាមួយកម្លាំងកងរាជអាវុធហត្ថស្រុកសង្កែបានចុះប្រតិបត្តិការបង្ក្រាបការជួញដូរសត្វព្រៃ(សត្វស្លាប)ចំនួន២ទីតាំង។ ទីតាំងទី១នៅចំណុចភូមិស្វាយធំ ឃុំអូរដំបង២ ស្រុកសង្កែ និងទីតាំងទី២នៅចំណុចភូមិច្រាបក្រសាំង សង្កាត់វត្តគរ
ខេត្តបាត់ដំបង។
លោកបន្តទៀតថា ក្នុងកិច្ចប្រតិបត្តិការខាងលើនេះផងដែរសមត្ថកិច្ចបានធ្វើការឃាត់នាំខ្លួនម្ចាស់២នាក់មកធ្វើការសាកសួរនិងបានចងក្រងសំណុំរឿងតាមនីតិវិធី នៃច្បាប់ស្តីពីព្រៃឈើ។ ចំណែកវត្ថុតាងសត្វព្រៃ(សត្វស្លាប)ងាប់ត្រូវបានធ្វើការដុតបំផ្លាញចោលនៅថ្នាលបណ្តុះកូនឈើខេត្តបាត់ដំបងនៅព្រឹកថ្ងៃទី២២ ខែធ្នូ ឆ្នាំ២០១៦នេះ។
លោកបន្តថា ក្នុងកិច្ចប្រតិបត្តិការបង្ក្រាបបទល្មើសសត្វព្រៃខាងលើនេះសមត្ថកិច្ចរឹបអូសបានសត្វព្រៃ(សត្វស្លាប)ងាប់ចំនួន៥៦៣ក្បាលក្នុងនោះរួមមាន៖ សត្វក្លុំចំនួន២០៥ក្បាល សត្វដុំដុរចំនួន១៥១ក្បាល សត្វកុកក្រកចំនួន១២៧ក្បាល សត្វដុំដុរសំពៅចំនួន៤០ក្បាលប សត្វសំបកត្រពាំងចំនួន៤០ក្បាល៕
