ខេត្តកោះកុង៖ មន្ទីរវប្បធម៌ខេត្តកោះ កុងបានក្លាយជាមន្ទីរគ្រួសារប្រធាននិងអនុប្រធានមន្ទីរគឺឪពុកនិងកូន ដែលបណ្តាលឲ្យមន្ត្រីជាច្រើន កំពុងតែធុញថបកើតការក្តៅក្រហាយលើលោក ប្រធានមន្ទីរ អ៊ុក នឿន ដែលពោរពេញទៅដោយអំពើពុករលួយ និងគ្រួសារនិយម បង្កឲ្យការដឹកនាំក្លាយជាផ្តាច់ការ។
តាមប្រភពបានឲ្យដឹងថា នៅមន្ទីរវប្បធម៌និងវិចិត្រសិល្បៈខេត្តកោះកុងក្នុងរយៈពេលជាង១០ ឆ្នាំមកនេះគឺលោកប្រធានមន្ទីរ អ៊ុក នឿន ឃុបឃិតជាមួយលោក អូន សុគាម ដែលជាប្រធានការិយាល័យរដ្ឋបាល និងហិរិញ្ញវត្ថុរបស់មន្ទីរនិងដែលត្រូវជាបងប្អូនជីដូនមួយរបស់លោកប្រធានមន្ទីររួមដៃគ្នាប្រព្រឹត្តិអំពើពុករលួយយ៉ាងចាស់ដៃដោយកឹបកេងថវិកាជាតិលើគ្រប់ជំពូកដែល ក្នុងមួយឆ្នាំៗរដ្ឋខាត់បង់ថវិកាយ៉ាងតិច២០០លានរៀល។
តាមប្រភពបានឲ្យដឹងថា ក្រៅពីការប្រព្រឹត្តិអំពើពុករលួយនៅ ឆ្នាំ២០១៤ប្រធានមន្ទីរមួយនេះបានរត់ការតែងតាំងកូនស្រីបង្កើត ម្នាក់ឈ្មោះ សម្បូរ ដាលីន ដែលទើបតែជាប់ជាមន្ត្រីរដ្ឋ ឲ្យកាន់តំណាងជាអនុប្រធានមន្ទីរ ដោយពុំបានប្រជុំវាយតម្លៃ ពីមន្ត្រីក្នុងមន្ទីរហើយក៏បានតែងតាំងកូនស្រីបង្កើតម្នាក់ទៀតធ្វើជាប្រធានការិយាល័យបេ តិកភ័ណ្ឌ ទើបធ្វើឲ្យមន្ត្រីចាស់ៗជាច្រើនកើតការក្តៅក្រហាយ ព្រោះថាលោកប្រធានគិតតែពីគ្រួសារ និងសាច់ញាតិ ដោយមិនគិតពីគុណសម្បត្តិរបស់មន្ត្រីចាស់ៗដែលខិតខំបំរើការងារនោះឡើយ។ ចំពោះការដឹកនាំមន្ទីរ រកការងារដែលមានផលប្រយោជន៍គឺលោកប្រធានមន្ទីរនិងលោកប្រធាន ការិយាល័យរដ្ឋបាលប្រមូលយកទៅក្តោបទាំងអស់។
តាមប្រភពបានឲ្យដឹងថា ដោយសារតែការដឹកនាំមន្ទីរតាមបែបគ្រួសារនិយមនិងការប្រព្រឹត្តិ អំពើពុករលួយបានធ្វើឲ្យរដ្ឋបាត់បង់ថវិកាដោយឥតប្រយោជន៍ក្នុងមួយ ឆ្នាំយ៉ាងតិច២០០លានរៀល ហើយថវិកាទាំងនេះបានធ្លាក់ចូលក្នុងដៃលោកប្រធានមន្ទីរ អ៊ុក នឿន និងបក្ខពួករបស់លោកប្រធាន២-៣នាក់តែប៉ុណ្ណោះ។ ចំណែកមន្ត្រីភាគច្រើនក្នុងចំណោមមន្ត្រីសរុបជាង២០នាក់គឺមិនទទួល បានផលប្រយោជន៍ទេ។ ហើយការប្រព្រឹត្តអំពើពុករលួយរបស់លោកប្រធានមន្ទីរនិងបក្ខពួកគឺ មានគ្រប់រូបភាពដូចជាការកឹបកេងប្រាក់ថែទាំជួសជុល របបបេសកម្ម ប្រាក់មន្ត្រីមានជំងឺនិងប្រាក់ទិញសម្ភារផ្សេងៗមួយចំនួនធំថែមទៀត ។
តាមប្រភពបានឲ្យដឹងទៀតថា នៅឆ្នាំ២០១៤មន្ទីរវប្បធម៌និងវិចិត្រសិល្បៈខេត្តកោះកុងគឺបានចំណាយ ថវិកាជាតិសរុបជិត៨០០លានរៀលក្នុងនោះជាង២០០លានរៀលដែលជាបន្ទុក បុគ្គលិក។ ក្រៅពីនោះប្រាក់ជាង៥០០លានរៀលទៀតដែលមិនមែនជាបន្ទុកបុគ្គលិកគឺ ត្រូវបានគេកឹបកេងអស់យ៉ាងតិច២០០លានរៀល ហើយប្រាក់ដែលនៅសេសសល់ទើប ត្រូវបានគេយកទៅចំណាយលើការងាររដ្ឋបាល និងកិច្ចការផ្សេងៗ។ ហើយចំពោះប្រាក់ដែលគេកឹបកេងបានច្រើនជាងគេនៅឆ្នាំ២០១៤នេះ គឺប្រាក់សំរាប់ថែទាំនិងជួសជុលដោយគេចំណាយអស់រហូតដល់ជាង៣០០លាន រៀល ប៉ុន្តែការចំណាយជាក់ស្តែងលើការធ្វើរបងមន្ទីរនិងចាក់សាបក្នុង មន្ទីរអស់ប្រាក់យ៉ាងច្រើនត្រឹម១០០លានរៀលតែប៉ុណ្ណោះ។ ដោយ មានបញ្ហាបែបនេះទើបធ្វើឲ្យមន្ត្រីភាគច្រើននៅក្នុងមន្ទីរខាងលើ មិនពេញចិត្តទៅនឹងប្រធានរបស់ខ្លួននោះ។
សូមរំលឹកថា នៅឆ្នាំ២០១៤មន្ទីរវប្បធម៌ និងវិចិត្រសិល្បៈខេត្តកោះកុងមានគម្រោងថវិកាជាតិសម្រាប់ចំណាយសរុបប្រមាណ៨២៧លានរៀល ក្នុងនោះជំពូក៦០មានចំនួន១២០លានរៀល ជំពូក៦១មានចំនួន៣៥០លានរៀល ជំពូក៦២មានចំនួន៨០លានរៀល និងជំពូក៦៤មានថវិកាចំនួន២៧៧លានរៀល។
សម្រាប់ការចំណាយជាក់ស្តែងពីដើមឆ្នាំរហូតដល់ចុងឆ្នាំ២០១៤គឺមន្ទីរបានចំណាយថវិកាសរុបអស់ជិត៨០០លានរៀល ហើយការចំណាយដែលនៅសល់នេះមិនមែនលោកប្រធានមន្ទីរនិងបក្ខពួករបស់គាត់ចង់ទុក្ខឲ្យសល់ទេ ប៉ុន្តែដោយសារនិតិវិធីហិរិញ្ញវត្ថុតែប៉ុណ្ណោះ។
មិនអាចទាក់ទងសុំការបំភ្លឺពីលោកប្រធាន និងអនុប្រធានមន្ទីរវប្បធម៌ខេត្តកោះកុងបានទេ កាលពីថ្ងៃ ព្រហស្បតិ៍សប្តាហ៍មុននេះ៕
មន្ទីរវប្បធម៌ និងវិចិត្រសិល្បៈខេត្តកោះកុង
