តួកគី៖លោកប្រធានាធិបតីតួកគី Recep Tayyip Erdogan កាលពីថ្ងៃអង្គារបាននិយាយថា ប្រទេសលោកខាងលិចបានធ្វើខុសសន្យានៅក្នុងប្រទេសស៊ីរីដោយចោទប្រកាន់ដៃគូរបស់រដ្ឋាភិបាលក្រុងអង់ការ៉ាថាបានគាំទ្រក្រុមភេរវករនានាដោយរួមទាំងក្រុមជីហាដ IS ផងដែរនៅក្នុងប្រទេសនេះ។
លោក Erdogan បាននិយាយនៅក្នុងសន្និសីទកាសែតមួយរួមជាមួយប្រធានាធិបតីហ្គីណេលោក Alpha Conde ដែលកំពុងធ្វើទស្សនកិច្ចថា “ជាអកុសល កងកម្លាំងក្រុមចម្រុះមិនបានធ្វើតាមពាក្យសន្យារបស់ខ្លួនទេ”។ លោកបានបន្ថែមថា “មិនថាតើពួកគេជួយឬពួកគេមិនជួយនោះទេ យើងនឹងនៅតែបន្តធ្វើតាម វិធីរបស់យើង។ យើងមិនដើរបកក្រោយចំពោះអ្វីដែលយើងបានកំណត់នោះទេ”។
លោក Erdogan បានត្អូញត្អែរថា ផ្ទុយពីការគាំទ្រដល់ប្រទេសតួកគីប្រទេសលោកខាងលិចបែរជាទៅគាំទ្រអង្គភាពការពារប្រជាជនឃើដ (YPG) និងគណបក្សសម្ព័ន្ធសហភាពប្រជាធិបតេយ្យ (PYD) វិញដែលធ្វើការជាមួយសហរដ្ឋអាមេរិកនៅលើដីគោកក្នុងប្រទេសស៊ីរីហើយក៏គាំទ្រក្រុមIS ផងដែរ៕
