ភ្នំពេញ: បញ្ជីឈ្មោះមន្ត្រីប៉េអឹម ប៉ូលិសសេដ្ឋកិច្ច មេព្រៃ បរិស្ថាន និងមន្ត្រីជំនាញដែលពាក់ព័ន្ធរួមទាំងអង្គការក្រៅរដ្ឋាភិបាលប្រមាណជិត ៥០ នាក់ ឃុបឃិតគ្នាជាបណ្តាញត្រូវបានលាតត្រដាងពាក់ព័ន្ធក្នុងការប្រព្រឹត្តអំពើ ពុករលួយ យកលុយពីក្រុមឈ្មួញរកស៊ីជួញដូរឈើប្រណិតៗ ដឹកចេញពីតំបន់ក្រវ៉ាញ ខេត្តពោធិសាត់ឆ្ពោះចូលមករាជធានីភ្នំពេញ តាមបណ្តោយផ្លូវជាតិលេខ៥។
នៅក្នុងបញ្ជីឈ្មោះដែលសមត្ថកិច្ចបានដកហូតបានពីក្រុមឈ្មួញរកស៊ីឈើ គឺមានដាក់ឈ្មោះ អង្គភាព និងលេខទូរស័ព្ទ មន្ត្រីដែលពាក់ព័ន្ធទាំងអស់នោះ ដើម្បីងាយស្រួលក្នុងការទំនាក់ទំនង និងជាពិសេសកុំឲ្យមានការបង្ក្រាបសកម្មភាពដឹកឈើរបស់ពួកគេ។
ការបែកធ្លាយបញ្ជីឈ្មោះមន្ត្រីប៉េអឹម ប៉ូលិសសេដ្ឋកិច្ច មេព្រៃ បរិស្ថាន និងមន្ត្រីជំនាញដែលពាក់ព័ន្ធរួមទាំងអង្គការក្រៅរដ្ឋាភិបាលប្រមាណជិត ៥០នាក់ គឺបន្ទាប់ពីប៉ូលិសបានចាប់ឡានក្រុមឈ្មួញឈើនៅត្រង់ចំណុចស្ពានជ្រៃបាក់ ក្នុងស្រុករលាប្អៀរ ខេត្តកំពង់ឆ្នាំង កាលពីថ្ងៃទី២៦ ខែមករា ឆ្នាំ២០១៥។
មន្ត្រីដែលពាក់ព័ន្ធក្នុងការយកលុយពីក្រុមឈ្មួញឈើ មានដូចជាៈ មេប៉េអឹមស្រុកក្រវ៉ាញ មេប៉េអឹមស្រុកវាលវែង មេប៉េអឹមស្រុកកំពង់លួង អធិការ អធិការរងស្រុកវាលវែង មេព្រៃក្រគរ មេព្រៃក្រវ៉ាញ មេព្រៃច្រលាច មេព្រៃពោធិសាត់ ប៉ូលិសសេដ្ឋកិច្ចឧត្តុង្គ ព្រែកក្តាម មេព្រៃព្រែកក្តាម មន្ត្រីបរិស្ថាន និងមមន្ត្រីអង្គការក្រៅរដ្ឋាភិបាលមួយចំនួន។
ពាក់ព័ន្ធករណីខាងលើនេះ មេប៉េអឹមស្រុកកំពង់លួង បានធ្វើការបដិសេធថា លោកមិនដែលបានទទួលលុយពីក្រុមឈ្មួញឈើទាំងនោះទេ ហើយក៏មិនដែលស្គាល់ឈ្មួញឈើដែរ។
ចំណែកលោកអធិការស្រុងវាលវែង បានអះអាងថា “ខ្ញុំអត់ដឹងទេ អត់ដែលបានដាក់គោលដៅកាក់ឡានឈើយកលុយទេ សូមបដិសេធ…”។
មេព្រៃកំពង់ត្រឡាច ក៏បានបដិសេធដែរថា លោកអត់ដែលបានទទួលផលប្រយោជន៍ពីក្រុមឈ្មួញឈើទេ។
មន្ត្រីជាន់ខ្ពស់អាវុធហត្ថលើផ្ទៃប្រទេសបានបង្ហើបឲ្យដឹងថា ចំពោះករណីនេះ គឺខាងអាវុធហត្ថកំពុងតែត្រួតពិនិត្យមើលរឿងនេះថា តើមន្ត្រីអាវុធហត្ថដែលមានឈ្មោះនៅក្នុងបញ្ជីរបស់ឈ្មួញឈើនោះ ពិតជាបានយកលុយគេមែនឬក៏អត់? ហើយបើរកឃើញថា ពិតជាមានការជាប់ពាក់ព័ន្ធមែននោះ នឹងត្រូវដាក់វិន័យតាមច្បាប់របស់អាវុធហត្ថ។
លោកប៉ុល វុទ្ធី ស្នងការរងនគរបាលខេត្តកំពង់ឆ្នាំង បានបញ្ជាក់ឲ្យដឹងថា បញ្ជីឈ្មោះមន្ត្រីជំនាញ និងសមត្ថកិច្ចពាក់ព័ន្ធនឹងការយកលុយពីឡានដឹកឈើនោះ ពិតជាមានមែន គឺសមត្ថកិច្ច ឆែកឆេររកឃើញ នៅក្នុងរថយន្តដឹកគ្រឿងសង្ហារឹម។
ចំណែកមន្ត្រីជាន់ខ្ពស់ក្រសួងមហាផ្ទៃ បានប្រាប់រស្មីកម្ពុជា ឲ្យដឹងថា ក្រសួងមហាផ្ទៃកំពុងតែពិនិត្យមើលករណីនេះ និងឲ្យមន្ត្រីជំនាញស្រាវជ្រាវឲ្យបានច្បាស់លាស់ រឿងមន្ត្រីប៉ូលិសដែលយកលុយពីឈ្មួញឈើ។
ពាក់ព័ន្ធករណីបទល្មើសព្រៃឈើនេះផងដែរ នៅក្នុងកិច្ចប្រជុំរបស់ក្រុមប្រឹក្សាជាតិប្រឆាំងអំពើពុរលួយ កាលពីថ្ងៃទី២៧ ខែមករា ឆ្នាំ២០១៥ បានបញ្ជាក់ថា ការលំបាកធំធេងរបស់អង្គភាពប្រឆាំងអំពើពុករលួយ ក្នុងការកែទម្រង់ស៊ីជម្រៅក្នុងវិស័យឡូត៍នេសាទ ព្រៃឈើ ដីធ្លី និងអំពីសកម្មភាពនានា។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ធ្លាប់បានបញ្ជាក់ថា ករណីទី១ នៅឆ្នាំ២០១៥ នេះ អាចជាករណីអំពើពុករលួយមួយ ដែលមានបណ្តាញ និងធ្វើឲ្យមានការបំផ្លាញដល់វិស័យមួយរបស់ជាតិ ដោយអង្គភាពប្រឆាំងអំពើពុករលួយកំពុងតែដំណើរការលើបញ្ហានេះ។ “ករណីថ្មី សម្រាប់ឆ្នាំ២០១៥ គឺការប្រព្រឹត្តអំពើពុករលួយ ជាបណ្តាញមួយឃុបឃិតគ្នា ធ្វើឲ្យអន្តរាយដល់ជាតិ ហើយបញ្ហានេះ គឺមានការតានតឹងមែនទែន ដោយអង្គភាពប្រឆាំងអំពើពុករលួយ នៅមិនទាន់ប្រាប់ពីក្រុមបណ្តាញទាំងនោះ បាននៅឡើយទេ។ អ្វីដែលខ្ញុំនិយាយនេះ អាចជាបញ្ហាមួយធ្ងន់ធ្ងរ”។
សូមជម្រាបថា បញ្ជីឈ្មោះ និងលេខទូរស័ព្ទរបស់មន្ត្រីជំនាញ និងសមត្ថកិច្ចពាក់ព័ន្ធជិត៥០នាក់ ដែលយកលុយពីឡានដឹកឈើតាមផ្លូវជាតិលេខ៥ ជារៀងរាល់ថ្ងៃនោះ ត្រូវបានមន្ត្រីប៉ូលិសខេត្តកំពង់ឆ្នាំង ថតចំលងចែកឲ្យបណ្តាញសារព័ត៍មាន និងបានផ្សព្វផ្សាយបន្តពីមួយទៅមួយ ជាពិសេសបង្ហោះនៅក្នុងបណ្តាញសង្គម (ហ្វេសប៊ុក) ដែលនាំឲ្យមានការរិះគន់យ៉ាងខ្លាំង។
បញ្ជីឈ្មោះ និងលេខទូរស័ព្ទរបស់មន្ត្រីជំនាញ និងសមត្ថកិច្ចទាំងនេះ ត្រូវបានគេរកឃើញនៅក្នុងរថយន្តដឹកឈើមួយគ្រឿង ដែលសមត្ថកិច្ចចាប់បាន កាលពីព្រឹកថ្ងៃទី២៦ ខែមករា ឆ្នាំ២០១៥។
ករណីនេះ មានការរិះគន់យ៉ាងខ្លាំង ពីមជ្ឈដ្ឋាននានា ចំពោះការប្រព្រឹត្តិអំពើរពុករលួយ ជាប្រព័ន្ធក្នុងបទល្មើសព្រៃឈើនេះ។ មានមជ្ឈដ្ឋានជាច្រើន បានលើកឡើងថា កន្លងទៅនេះ គេសង្កេតឃើញមានរថយន្តដឹកឈើ ទាំងតូចទាំងធំ ចង់រូងផ្លូវជាតិលេខ៥ ទៅហើយ ប៉ុន្តែគេកម្រនឹងឃើញ សមត្ថកិច្ចដែលនៅបណ្តាក់គ្នាដូចខ្យងចាប់បានរថយន្តទាំងនោះណាស់ លុះត្រាណាតែរថយន្តដឹកឈើនោះមិនបង់លុយ ឬក្រឡាប់ក្អួតចេញឈើ ទើបគេនាំគ្នា ស្ទាក់ចាប់ និងទៅដណ្តើមយកវត្ថុតាង៕H/L
