ខេត្តក្រចេះ៖សម្តេចក្រុមព្រះ ន.រណឫទ្ធិ ព្រះប្រធានគណបក្ស ហ្វ៊ុនស៊ិនប៉ិច មានបន្ទូលថា លោក សម រង្ស៊ី កុំសង្ឃឹមថា បានចូលមកស្រុកខ្មែរវិញប្រសិនបើមិនហ៊ានទទួលទោសកំហុសរបស់ខ្លួននោះ។ ព្រះអង្គបន្តថា លោក សម រង្ស៊ី និងលោក កឹម សុខា ក៏កំពុងបែបបាក់គ្នាផងដែរ ដោយសារម្នាក់នៅក្រៅប្រទេស និងម្នាក់ទៀតនៅក្នុងប្រទេសនោះ។ បន្ទូលសម្តេចក្រុមព្រះធ្វើឡើងក្នុងឱកាសជួបសំណេះសំណាលជាមួយអ្នកគាំទ្រគណបក្សនៅខេត្តក្រចេះ កាលពីម្សិលមិញ។
សម្តេចក្រុមព្រះក៏បានថ្លែងចំអក ផងដែរថា ការអួតអាងរបស់លោក សម រង្ស៊ីថាគណបក្សសង្គ្រោះជាតិនឹងឈ្នះភ្លូក ទឹក ភ្លូកដី នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧និងបោះឆ្នោតសកលឆ្នាំ២០១៨ខាងមុខនេះគឺមិនអាចទៅរួចឡើយ ដោយសារតែការអួតអាងរបស់លោក សម រង្ស៊ីនេះគឺមិនមែនជាលើកទីមួយនោះទេគឺតែងតែអួតជារៀងរាល់ការបោះឆ្នោតដូច្នេះអ្វីគ្រប់យ៉ាងគឺដូចកាលពីកន្លងទៅយ៉ាងដូច្នេះឯង។
សម្តេចក្រុមព្រះនរោត្តម រណ ឫទ្ធិ ថែមទាំងមានបន្ទូលថា លោក សម រង្ស៊ី តែងតែអះអាងខ្លួនឯងថាស្រលាញ់ប្រទេសជាតិ និងប្រជាជនកម្ពុជាប៉ុន្តែខ្លួនឯងគិតតែនៅខាងក្រៅហើយ ថែមទាំងធ្វើផ្ទះនៅប្រទេសបារាំងថែមទៀត៕
