រាជធានីភ្នំពេញ៖ជនសង្ស័យដែល២នាក់ដែលជាក្រុមចោរប្លន់យ៉ាងសកម្មនៅរាជធានីភ្នំពេញត្រូវបានសមត្ថកិច្ចធ្វើការបង្ក្រាបកាលពីវេលាម៉ោង៩និង៣០ នាទីយប់ ថ្ងៃទី១៩ ខែមករា ឆ្នាំ២០១៧ ក្នុងផ្ទះមួយល្វែងស្ថិតនៅបុរី សន្តិភាព២ សង្កាត់ច្រាំងចំរះទី២ ខណ្ឌឫស្សីកែវ ។
លោក ទៀង ចាន់សា អធិការដ្ឋាននគរបាលខណ្ឌឬស្សីកែវបានឲ្យដឹងថា មុនពេលកើតហេតុកម្លាំងសមត្ថកិច្ចកំពុងតែជិះល្បាត ក្នុងមូលដ្ឋាន ពេលដែលកំពុងតែជិះល្បាតនោះ សមត្ថកិច្ចក៏បានឃើញជនល្មើសជិះម៉ូតូតែម្នាក់ឯង។ ដោយមានដីកាពីតុលាការ និងដោយសមត្ថកិច្ចស្គាល់ភិនភាគផងនោះ សមត្ថកិច្ចបានហៅជនល្មើសអោយឈប់ តែជនល្មើសមិនព្រមឈប់ទេ តែបែរជាជិះម៉ូតូគេចពីសមត្ថកិច្ចទៅវិញ ។
ដោយឃើញសភាពការណ៍មិនស្រួល សមត្ថកិច្ចបានជិះតាមព្រមទាំងប្រកាសតាមវិទ្យុទាក់ទងអោយតាមស្ទាក់មុខសញ្ញា។ បន្ទាប់ពីជិះដេញតាមរហូតដល់ផ្លូវឡឥដ្ឋព្រំប្រទល់ប៉ុស្តិ៍ច្រាំងចំរះទី២ និងប៉ុស្តិ៍ច្រាំចំរះទី១ ជនល្មើស បានជិះបុកម៉ូតូសមត្ថកិច្ច ដែលឈប់ចំពីមុខបណ្តាលអោយដួលម៉ូតូទាំង២ ហើយពេលដែលម៉ូតូដួលនោះជន ល្មើសបានជ្រុះកាំភ្លើងខ្លីមួយដើមម៉ាក K59 ។
ភ្លាមៗនោះសមត្ថកិច្ចបានផ្ទុះអាវុធចំនួន២គ្រាប់ ធ្វើអោយជនល្មើស ភ័យរត់យកតែរួចខ្លួន រហូតដល់ផ្ទះរបស់គេដែលមានទីតាំង បុរីសន្តិភាព២នេះ។ ពេលដែលសមត្ថកិច្ចដឹងថាជន ល្មើសរត់ចូលសំងំក្នុងផ្ទះ សមត្ថកិច្ចបានឡោមព័ទ្ធផ្ទះជនល្មើស និងបានចូលទៅចាប់បានតែម្តងទៅ។ ក្រោយពេលចាប់បាន និងសួរនាំរួចមកជនល្មើសត្រូវបានសមត្ថកិច្ចឃុំខ្លួនបណ្តោះអាសន្ននៅអធិការដ្ឋានខណ្ឌឫស្សីកែវ៕
