ត្បូងឃ្មុំ៖មន្ត្រីសាខាកាំកុងត្រូលប្រចាំខេត្តត្បូងឃ្មុំ ដឹកនាំដោយលោក មាស មោរ៉ា ប្រធានសាខាកាំកុងត្រូលខេត្តត្បូងឃ្មុំ និងលោក អ៊ុក ជាវសុទ្ធា អនុប្រធានកាំកុងត្រូលខេត្ត សហការណ៍ជាមួយមន្ទីរពាណិជ្ជកម្មខេត្តកាលពីម្សិលមិញបានចុះធ្វើការត្រួតពិនិត្យគុណភាពទំនិញ អាជីវករលក់ដូរនៅផ្សារ និងនៅតាមផ្ទះជុំវិញផ្សារចុងជាច ស្ថិតនៅក្នុងឃុំចុងជាច ស្រុកតំបែរ ខេត្តត្បូងឃ្មុំ ។
លោក មាស មោរ៉ា បានឲ្យដឹងថា គោលបំណងនៃការចុះអង្កេតនេះ ដោយផ្អែកទៅលើការណែនាំ របស់អគ្គនាយកដ្ឋានកាំកុងត្រូល ជាពិសេសអនុសាសន៍របស់ ឯកឧត្តម ម៉ក់ ពេជ្ជរិទ្ធ អគ្គនាយកដ្ឋានកាំកុងត្រូល បានណែនាំដល់មន្ត្រីកាំកុងត្រូល គ្រប់សាខាទាំងអស់ទូទាំងប្រទេសឲ្យធ្វើការ ត្រួតពិនិត្យទំនិញជាផលិតផលម្ហូបអារហារ តាមទីផ្សារជាប្រចាំ ដើម្បីធានាសុខភាពប្រជាពលរដ្ឋ ជាអ្នកប្រើប្រាស់។
លោកប្រធានសាខាកាំកុងត្រូលខេត្តត្បូងឃ្មុំ បានឲ្យដឹងទៀតថា ជាលទ្ធផលក្នុងការចុះអង្កេតនោះ មន្ត្រីកាំកុងត្រូលបានធ្វើការត្រួតពិនិត្យឃើញ និងដកហូតទំនិញជាគ្រឿងឧបភោគ និងបរិភោគ ហួសកាលបរិច្ឆេទ នៃការប្រើប្រាស់ សំបកកំប៉ោង កំពិត និងពុំមានស្លាកសញ្ញា លើសំបកវេចខ្ចប់ត្រឹមត្រូវ មានដូចជាទឹកក្រូចទឹកផ្លែឈើ អាហារកំប៉ុង បានចំនួន០៨មុខ ស្មើនឹង៣២៤កំប៉ុង/កញ្ចប់ គិតជាទំងន់ជាង ១២៨គីឡូក្រាម ដើម្បីយកទៅកំទេចចោល ព្រមទាំងបានធ្វើការអប់រំ ក៍ដូចជាណែនាំដល់អាជីវករ អោយដាក់តាំងលក់ទំនិញដែលមានគុណភាពល្អ មានស្លាកសញ្ញាត្រឹមត្រូវ និងហាមដាច់ខាត ទំនិញដែលគ្មានកាលបរិច្ឆេទច្បាស់លាល់ ជាពិសេសហួសកាលបរិច្ឆេទប្រើប្រាស់ ដែលខុសបទបញ្ញតិនៃច្បាប់ព្រមទាំងបិទស្លាកស្ទីកគ័រ និងបង្ហាញដល់អាជីវករ ក៍ដូចជាប្រជាពលរដ្ឋនូវ របៀបមើលថ្ងៃខែកំណត់នៃការបរិច្ឆេទ និងការជ្រើសរើសផលិតផលម្ហូបអាហារ ដែលមានសុវត្ថិភាពសម្រាប់ទទួលទាន៕
