ខេត្តកំពង់ស្ពឺ៖បុរសជនជាតិចិនត្រូវបានកម្លាំងនគរបាលឃាត់បញ្ជូនទៅអធិការនគរបាលក្រុងច្បារមន បន្ទាប់ទាញប៉័ងតោកាប់ប្រពន្ធ ព្រោះខឹងរឿងចាប់បង្ខំរួមរ័ក តែនាងមិនព្រម ដែលហេការណ៍ការភ្ញាក់ផ្អើលនេះកើតឡើងកាលពីវេលាម៉ោង៣ និង៥៥នាទីទៀបភ្លឺ ថ្ងៃទី២៥ ខែមករា ឆ្នាំ២០១៧ នៅផ្ទះរបស់ប្រពន្ធសមត្ថកិច្ចក្នុងសង្កាត់ស្វាយក្រវ៉ាន់ ក្រុងច្បារមន។
បុរសជនជាតិចិនជាប្តីឈ្មោះ តូវ ឈិនហ័ង អាយុ៣៣ឆ្នាំ ត្រូវបានសមត្ថកិច្ចចាប់ខ្លួន មានប្រពន្ធខ្មែរឈ្មោះ អ.អ.ម អាយុ២១ឆ្នាំ រស់នៅភូមិកើតហេតុ។
នារីរងគ្រោះជាប្រពន្ធបានឲ្យសមត្ថកិច្ចដឹងថា នៅវេលាទៀបភ្លឺថ្ងៃកើតហេតុប្តីរបស់នាងបានបង្ខំរួមរ័កជាមួយនាង តែនាងមិនព្រម ព្រោះនាងមិនស្រួលខ្លួន ពេលនេះប្តីរបស់នាងខឹងយ៉ាងខ្លាំង ហើយដើរទៅយកប៉័ងតោកាប់នាង៣កាំបិត ចំក្រោមភ្នែក១កាំបិត កដៃស្តាំ១កាំបិត និងស្មាខាងស្តាំ១កាំបិត ។ លុះភ្លឺឡើងនាងក៏ទៅដាក់ពាក្យបណ្ដឹងឲ្យសមត្ថកិច្ចចាប់ខ្លួនតែម្តង ។
ក្រោយពេលចាប់ខ្លួន ជនសង្ស័យជាប្តីត្រូវបានបញ្ជូនទៅអធិការដ្ឋាននគរបាលក្រុងច្បារមន ធ្វើការសាកសួរ និងកសាងសំណុំរឿងបញ្ជូនបន្តទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕
