រាជធានីភ្នំពេញ៖ប្រភពពីមន្ត្រីបក្សប្រឆាំងឲ្យដឹងថា ក្រុមតំណាងរាស្ត្រគណបក្សនេះ គ្រោងនឹងកោះហៅរដ្ឋមន្ត្រីក្រសួងការពារជាតិ ទៅបំភ្លឺក្នុងរដ្ឋសភា ករណីដំឡើងឋានន្តរស័ក្ដិដល់មន្ត្រីយោធា២រូប ដែលវាយតំណាងរាស្ត្រ CNRP កាលពីប៉ុន្មានឆ្នាំមុន។
លោក ហូ វ៉ាន់ តំណាងរាស្ត្របក្សប្រឆាំងបានថ្លែងថា តំណាងរាស្ត្របក្សប្រឆាំងទាំង ៥៥រូប អាចនឹងកោះហៅរដ្ឋមន្ត្រីក្រសួងការពារជាតិ មកឆ្លើយបំភ្លឺក្នុងរដ្ឋសភា បន្ទាប់ពីមានរាជក្រឹត្យមួយចុះផ្សាយកាលពីថ្ងៃទី២២ ខែវិច្ឆិកា ឆ្នាំ២០១៦ ដែលព្រះមហាក្សត្រព្រះបរមនាថ នរោត្តម សីហមុនី ត្រាស់បង្គាប់តែងតាំងវរសេនីយ៍ឯកពីររូប ឡើងជាឧត្តមសេនីយ៍ត្រី ខណដែលមន្ត្រីយោធាទាំងនោះធ្លាប់បានវាយតំណាងរាស្ត្រនាពេលកន្លងទៅ ។
យ៉ាងណាក៏ដោយ លោក ឈុំ សុជាតិ អ្នកនាំពាក្យក្រសួងការពារជាតិ ធ្លាប់បានថ្លែងថា ការដំឡើងជានន្តរស័កិ្តមន្ត្រីយោធាទាំង២រូបនោះ គឺក្រោយពេលដែលពួកគេបានទទួលទោសតាមច្បាប់រួចរាល់ ហើយរាល់ការតម្លើងស័ក្កដល់មន្ត្រី គឺអាស្រ័យទៅលើស្នាដៃ ឬសកម្មភាពការងាររបស់បុគ្គលម្នាក់ៗ និងជាតួនាទីភារកិច្ចរបស់ក្រសួងការពារជាតិ៕
