ភ្នំពេញ៖ លោក ខៀវ កាញារីទ្ធ រដ្ឋមន្ត្រី ក្រសួងព័ត៌មាន បាននាំយកអំណោយគ្រឿងឧបភោគ បរិភោគ និងថវិកាជូនដល់លោកតា ផ្លុង មឿក អតីតសិល្បករតន្រី្តបូរាណនៃវិទ្យុជាតិកម្ពុជា ដែលមាន ជន្មាយុ ៨២ឆ្នាំ ស្នាក់នៅក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីរសៀលថ្ងៃ ទី០៤ ខែកុម្ភៈ ឆ្នាំ២០១៥ ។
លោកតា ផ្លុង មឿក បានថ្លែងថា ខ្ញុំមានការភ្លេចភ្លាំងខ្លះៗហើយ ហើយលោករដ្ឋមន្ត្រីនៅតែ មានក្តីអាណិតអាសូរ និងយកចិត្តទុកដាក់ដល់ អ្នកសិល្បៈ ហើយខ្ញុំក៏អស់ចិត្តដែរ មុននឹងខ្ញុំស្លាប់ទៅ ដោយបានជួយសម្តេច និងបានជួប ជាមួយលោក ខៀវ កាញារិទ្ធ រដ្ឋមន្ត្រីក្រសួងព័ត៌មាន។
លោករដ្ឋមន្ត្រីបានថ្លែងថា លោកតា ផ្លុង មឿក ធ្លាប់កំសត់កំរ ជាមួយគ្នារហូតមក ហើយលោកបានផ្តាំផ្ញើដល់លោកតា ផ្លុង មឿក អោយខំថែរក្សាសុខភាព ហូបចុកអោយបានច្រើន។ នៅដើមខែមីនាខាងមុខ នេះ ក្រសួងព័ត៌មាននឹងរៀបចំ កម្មវិធីមួយ ដើម្បីជួបជុំអ្នកដែលចូលនិវត្តន៍។
គួរបញ្ជាក់ថា លោកតា ផ្លុង មឿក កើតនៅភូមិកោះស្នា ស្រុកអង្គស្នួល ខេត្តកណ្តាល។ ការសិក្សារបស់លោក គឺលោករៀនផ្នែកព្រះពុទ្ធសាសនា។ នៅអាយុ១២ឆ្នាំ ជីដូនរបស់លោក បានបញ្ជូនលោកទៅរៀនក្បួនច្បាប់ ធម៌វិន័យ នៅក្នុង “វត្តស្រះស្រង់” ស្ថិតក្នុងឃុំកំបូល ស្រុកអង្គស្នួល ខេត្តកណ្ដាល ដើម្បីបូសជាព្រះសង្ឃ។
លោកបានធ្វើជាកូនសិស្សព្រះសង្ឃ ប្រតិបត្តិ ក្បួនច្បាប់ ធម៌វិន័យ បានប្រហែល២ឆ្នាំ ទើបបានបូស ជាសាមណេរ នៅក្នុងវត្ត ស្រះស្រង់ នេះតែម្ដង ដោយបួសបានចំនួន៥ ព្រះវស្សា ក៏បានសឹកវិញ។ កាលលោកតានៅជាព្រះសង្ឃលោករៀនចេះ ធម៌អាថ៌ ច្រើនគួរសម ជាពិសេស ការស្មូត ដែលកាលនោះមានពុទ្ធបរិស័ទ និមន្តលោក ទៅស្មូតច្រើនណាស់។ លោកតាបានចាប់ផ្តើម រៀនសិល្បៈ នៅវ័យ២០ឆ្នាំ រហូត មកទល់នឹងពេលនេះ លោកតា មានសមត្ថភាពសម្តែងសិល្បៈច្រើនណាស់ ដូចជា ចម្រៀងអាយ៉ៃ ចម្រៀងប្រពៃណី ចម្រៀងសម័យ កំប្លែង ល្ខោនបាសាក់ ល្ខោនយីកេ ឡកឆៃយ៉ាំ វាយឃឹម វាយស្គរ និង កូតទ្រជាដើម។
លោក ផ្លុង មឿក ធ្លាប់ឆ្លងកាត់ជីវិតអាពាហ៍ពិពាហ៍ចំនួន២លើករួចមកហើយ លើកទី១ លោកធ្លាប់រៀបអាពាហ៍ពិពាហ៍ជាមួយអ្នកស្រី នុត ណាត់ ក្នុងឆ្នាំ១៩៦០។ ភរិយារបស់លោក អ្នកស្រី នុត ណាត់ គឺកសិករ រស់នៅក្នុងភូមិត្រពាំងថ្លាន់ ឃុំពន្ធសាំង ស្រុកអង្គស្នួល ខេត្តកណ្ដាល តែគាត់(ប្រពន្ធ)បានស្លាប់នៅក្នុងរបបប៉ុលពត។ លោក តា ផ្លុង មឿក មានកូនចំនួន៤នាក់ ស្រី ទាំងអស់។
លោក មឿក បានរៀបអាពាហ៍ពិពាហ៍លើកទី២ ជាមួយអ្នកស្រី ពិ រ៉ា ដែលជាអ្នករស់នៅខេត្ត កំពង់ចាម ក្នុងឆ្នាំ ១៩៨០ រហូតមកដល់បច្ចុប្បន្នភរិយារបស់លោកអ្នកស្រី ពិ រ៉ា មានអាយុ៦២ ឆ្នាំ ហើយពួកគាត់ បង្កើតបានកូន ៥នាក់ទៀត គឺប្រុស៣ ស្រី៣។ ក្នុងចំណោមកូនទាំងអស់ របស់លោក លោកបានបណ្ដុះបណ្ដាលឲ្យក្លាយទៅជាអ្នកសិល្បៈបានម្នាក់ គឺកូនប្រពន្ធមុនបច្ចុប្បន្នកំពុងរស់នៅសហរដ្ឋអាមេរិក ជាមួយស្វាមីដែលជាជនជាតិអាមេរិក៕
