រាជធានីភ្នំពេញ៖សមត្ថកិច្ចការិយាល័យជំនាញចរាចរណ៍ផ្លូវគោក បានធ្វើការដោះលែងស្ត្រីឈ្មោះ ពៅ សុបញ្ញាណាផា ដែលស្រវឹងស្រាបើករថយន្តម៉ាក ហាយឡេនឌឺ បុកអ្នកជិះម៉ូតូ២នាក់ បណ្តាលឲ្យរងរបួសធ្ងន់ រួចជ្រុលទៅបុកផ្ទះអ្នកស្រុក និងបន្តបុករថយន្តលុច្សស៊ីសមួយគ្រឿងទៀតនោះ ឲ្យត្រឡប់ទៅផ្ទះវិញហើយ ដោយសារតែស្ត្រីជាជនបង្ក បានសងសំណងទៅឱ្យជនរងគ្រោះ ។ នេះបើយោងតាមប្រភពព័ត៌មានពីមន្ត្រីការិយាល័យចរាចរណ៍ផ្លូវគោគរាជធានីភ្នំពេញ ដែលសុំមិនឲ្យបញ្ចេញឈ្មោះ ។
យ៉ាងណាក៏ដោយ ប្រជាពលរដ្ឋនិងក្រុមអ្នកច្បាប់បានធ្វើការរិះគន់យ៉ាងខ្លាំងចំពោះចំណាត់ការរបស់សមត្ថកិច្ច ព្រោះថា តាមច្បាប់ស្ត្រីរូបនោះនៅជាប់បណ្តឹងអាជ្ញាបន្តទៀត បើទោះជាផ្តល់សំណងដល់ជនរងគ្រោះក៏ដោយចុះ ។
សូមរំលឹកថា កាលពីវេលាម៉ោង១២ និង៣៥នាទី រំលងអាធ្រាតឈានចូលថ្ងៃទី៣១ ខែមករា ឆ្នាំ២០១៧ មានករណីគ្រោះថ្នាក់ចរាចរណ៍មួយ បានកើតឡើងនៅចំណុចមុខផ្ទះលេខ២០៧ ស្ថិតលើផ្លូវបេតុងវត្តអង្គតាមិញ ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ដែលបង្កឡើងដោយរថយន្តម៉ាក ហាយឡេនឌឺ ពណ៍ស ពាក់ស្លាកលេខ ភ្នំពេញ 2Y-8963 បើកបរដោយស្ត្រីស្រវឹងស្រាឈ្មោះ ពៅ សុបញ្ញាណាផា អាយុ២២ឆ្នាំ ធ្វើកាក្នុងប្រលានយន្តហោះពោធិ៍ចិនតុង ទីលំនៅផ្លូវ១១០ ផ្ទះលេខ៤៦Eo ក្រុម៥ផ្សារដេប៉ូ៣
ខណ្ឌទួលគោក។
ហេតុការណ៍នោះ រថយន្តជនបង្ក បានបុកម៉ូតូមួយគ្រឿងបណ្តាលឱ្យបុរស២នាក់ រងរបួសធ្ងន់ ត្រូវរថយន្តសង្គ្រោះដឹកទៅមន្ទីរពេទ្យភ្លាមៗ។ ក្រោយពីបុកម៉ូតូរួចរថយន្តជនបង្ក បានជ្រុលទៅបុកចូលផ្ទះអ្នកស្រុក រហូតបាក់ទ្វារ និងបុករថយន្តឡិចស៊ីស១គ្រឿង របស់ម្ចាស់ផ្ទះរងការខូតខាតយ៉ាងដំណំ។
យោងតាមច្បាប់ស្តីពី ចរាចរណ៍ផ្លូវគោក ថ្មីត្រង់មាត្រា៨៣ ចំណុច “ខ” និងចំណុច “គ” បានចែងថា ជនណាបើកបរដោយស្ថិតក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ មីលីក្រាមក្នុងមួយលីត្រខ្យល់ ឬចាប់ពី ០,៨០ ក្រាមក្នុងមួយលីត្រឈាមឡើងទៅ និងបណ្តាលឱ្យមានរបួសមនុស្សច្រើននាក់ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ និងពិន័យជាប្រាក់ពី៤លានរៀល ទៅ១៥លានរៀល ប៉ុន្តែអ្វីដែលចម្លែកនោះ គឺស្ត្រីបង្កហេតុបានរួចផុតពីសំណាញ់ច្បាប់យ៉ាងងាយបំផុត ដោយគ្រាន់តែមានការអះអាងថា បានសងសំណងដល់ជនរងគ្រោះ តែប៉ុណ្ណោះ ។
គេមិនដឹងថា តើការសម្រេចឲ្យជនបង្កមានសេរីភាពឡើងវិញ ដោយមិនបានទទួលទោសទណ្ឌនោះ សមត្ថកិច្ចនគរបាលបានផ្អែកលើច្បាប់ណាមួយនោះទេ ។ ប៉ុន្តែភ្នំពេញថ្មី បាននិងកំពុងព្យាយាមទំនាក់ទំនងលោក ចេវ ហាក់ ប្រធានការិយាល័យចរាចរណ៍ផ្លូវគោគនៃស្នងការដ្ឋាននគរបាលរាជធានីភ្នំពេញ ដើម្បីសួរបញ្ជាក់អំពីបញ្ហាខាងលើនេះ ៕
