អ៊ីតាលី៖មុខសង្ឃកាតូលិកសម្តេចប៉ាបហ្វ្រង់ស័របានបញ្ចេញប្រតិកម្មទិតៀនខ្លាំងៗលើរដ្ឋាភិបាលមីយ៉ាន់ម៉ាក្នុងសំណុំរឿងជនជាតិភាគតិចរ៉ូហ៊ីងយ៉ា ដែលអ្នកកាន់សាសនាអ៊ីស្លាមរស់ក្នុងទឹកដីភូមា ដោយសម្តេចប៉ាបហ្វ្រង់ស័រលើកឡើងថា ពួករ៉ូហ៊ីងយ៉ាត្រូវបានគេវាយធ្វើបាបដោយសារតែពួកនេះប្រាថ្នាចង់រស់នៅតាមទំនៀមទម្លាប់ ប្រពៃណីសាសនារបស់ពួកគេប៉ុណ្ណោះ។
ការបញ្ចេញប្រតិកម្មនេះធ្វើឡើងកាលពីម្សិលមិញនៅបុរីវ៉ាទីកង់ ប្រទេសអ៊ីតាលី នាឱកាសទិវាបន់ស្រន់ប្រឆាំងនឹងការជួញដូរមនុស្សដែលមានគ្រិស្តបរិស័ទចូលរួមជាច្រើនពាន់នាក់ និងបន្ទាប់ពីតុលាការក្រុងរ៉ង់ហ្គូនបានកាត់ទោសប៉ូលិសភូមាចំនួន ៣នាក់ឲ្យជាប់គុកចំនួន ២ខែពីបទបានវាយប្រហារលើពួករ៉ូហ៊ីងយ៉ា។
សម្តេចប៉ាបហ្វ្រង់ស័របានលើកឡើងចំៗថា អស់ជាច្រើនឆ្នាំកន្លងមកហើយដែលពួករ៉ូហ៊ីងយ៉ាត្រូវបានគេវាយធ្វើបាប និងសម្លាប់ចោលដោយសារតែជនជាតិភាគតិចអ្នកកាន់សាសនាអ៊ីស្លាមមួយនេះប្រាថ្នាចង់រស់នៅជាមួយនឹងវប្បធម៌ ប្រពៃណីសាសនារបស់ពួកគេ។ ទន្ទឹមនោះសម្តេចប៉ាបក៏បានអំពាវនាវឲ្យបន់ស្រន់ចំពោះពលរដ្ឋរ៉ូហ៊ីងយ៉ាដែលត្រូវបានរដ្ឋអំណាចភូមាបណ្តេញចេញពីទឹកដីភូមាផងដែរ។
គួរបញ្ជាក់ថា តាមរបាយការណ៍ គិតតាំងពីខែតុលា ឆ្នាំ ២០១៦ មកទល់ពេលនេះ មានពួករ៉ូហ៊ីងយ៉ាប្រមាណ ៦៦ ០០០នាក់បានភៀសខ្លួនរត់ទៅជ្រកកោណក្នុងប្រទេសបង់ក្លាដែស និងមានប្រមាណជា ២២ ០០០នាក់ផ្សេងទៀតបានប្តូរកន្លែងរស់នៅក្នុងប្រទេសភូមា៕
