ដោយ៖វិធិន
ក្រចេះ៖កម្លាំងកងរាជអាវុធហត្ថស្រុកចិត្របុរី សហការជាមួយអាវុធហត្ថក្រុង និងមន្ត្រីរដ្ឋបាលព្រៃឈើសង្កាត់ថ្មក្រែ ស្ទាក់ចាប់រថយន្តម៉ាកសាំយ៉ុងចំនួន ៣គ្រឿង ដឹកឈើប្រណីត និងឈើអារ ដែលដឹកចេញពីខេត្តស្ទឹងត្រែង តម្រង់ឆ្ពោះទៅកាន់ប្រទេសវៀតណាម តាមខេត្តត្បូងឃ្មុំ ។
មន្ត្រីអាវុធហត្ថ បានបញ្ជាក់នៅរសៀលថ្ងៃទី៩ ខែកុម្ភៈ ឆ្នាំ២០១៧នេះថា រថយន្តទាំង ៣គ្រឿង ត្រូវបានកម្លាំងកងរាជអាវុធហត្ថ សហការជាមួយ មន្ត្រីរដ្ឋបាលព្រៃឈើ ស្ទាក់ចាប់បាននៅគល់ស្ពានពាមតេ ឋិតក្នុងសង្កាត់រការកណ្ដាល ក្រុងក្រចេះ ខេត្តក្រចេះ កាលពីវេលាទាបភ្លឺតែភ្លាមៗនោះ អ្នកបើករថយន្តបានរត់គេចខ្លួនអស់ ។
នាយសង្កាត់រដ្ឋបាលព្រៃឈើថ្មក្រែ បានឲ្យដឹងថា រថយន្តទាំង ៣គ្រឿងនោះ ២គ្រឿង មានដឹកឈើប្រណីតប្រភេទធ្នង់ និង១គ្រឿងទៀត ដឹកឈើអារប្រភេទលេខ២ ។
បន្ទាប់ពីបង្ក្រាបបាន រថយន្តទាំង ៣គ្រឿងត្រូវបាននាំយកទៅរក្សាទុក នៅថ្នាលបណ្តុះកូនឈើខ្សា ដើម្បីរង់ចាំរាប់ចំនួន និងចាត់ការតាមនីតិវិធី ៕
