វេបសាយព័ត៌មាន Khaosod បានរាយការថា បងថ្លៃរបស់រាជទាយាទថៃត្រូវ បានកាត់ទោសជាប់ពន្ធនាគារពីរឆ្នាំកន្លះ ក្រោយពីរកឃើញកំហុសពីបទប្រមាថព្រះមហាក្សត្រ។ នេះបើយោងតាមវេបសាយ Straitstimes ចេញផ្សាយកាលពីថ្ងៃទី ៣ ខែកុម្ភៈ។
តុលាការបានរកឃើញថា លោកស្រី ស៊ូដាធីប មួងនួន (Sudathip Muangnuan) បានយកឋានៈខ្លួនឯងជាបងស្រីរបស់អតីតព្រះអង្គម្ចាស់ក្សត្រី ស្រ៊ីរ៉ាស្មី (Srirasmi) មហេសីរបស់ព្រះអង្គម្ចាស់ មហា វិជ្ជរ៉ាឡុងកន (Maha Vajiralongkorn) ដើម្បីលក់ផលិតផលអាហារតម្លៃខ្ពស់ឲ្យទៅរាជវាំងអស់រយៈពេល ១២ ឆ្នាំកន្លងមកនេះ។
យោងតាមឯកសារតុលាការ លោកស្រីស៊ូដាធីបទទួលបានសិទ្ធិផ្គត់ផ្គង់ដល់រាជវាំងជាមួយនឹងផលិតផល ម្ហូបជាច្រើនដូចជាម្ទេសកំប៉ុងជាដើម ដោយប្រើប្រាស់ទំនាក់ទំនងរបស់ខ្លួនជាមួយនឹងគ្រួសាររាជវង្សដើម្បី ដាក់គំនាបគូប្រជែងដទៃទៀតឲ្យបោះបង់ចោលការដេញថ្លៃលើកិច្ចសន្យា ផ្គត់ផ្គង់។
នៅថ្ងៃទី ២ ខែកុម្ភៈ ឆ្នាំ ២០១៥ ពួកចៅក្រមបានរកឃើញកំហុសរបស់លោកស្រីពីបទរំលោភច្បាប់ស្តីពី ព្រះមហាក្សត្ររបស់ថៃ ដែលអាចត្រូវផ្តន្ទាទោសឲ្យជាប់គុករហូតដល់ ១៥ ឆ្នាំ។
ព័ត៌មានពិស្តាររបស់តុលាការបានអាន ថា “ពាក្យសម្តីរបស់ចុងចោទគឺមានលក្ខណៈបង្ខូចកេរ្តិ៍ឈ្មោះ អះអាងដោយការក្លែងបន្លំ និងប្រមាថព្រះមហាក្សត្រ។ លោកស្រីបានប្រមាថ ធ្វើការចោទប្រកាន់ដោយការមួរបង្កាច់ និងបង្កការខូចខាតដល់ស្ថាប័នមហាក្សត្រ”។
លោកស្រីស៊ូដាធីបត្រូវបានចាប់ខ្លួនកាលពីខែធ្នូឆ្នាំ ២០១៤ និងត្រូវបានកំណត់អត្តសញ្ញាណដោយប៉ូលិសថាជាអ្នកសមគំនិតក្នុង អំពើពុករលួយដ៏ធំ និង ក្រុមចាប់ជំរិត ដឹកនាំដោយមន្ត្រីប៉ូលិសសក្តិខ្ពស់ក្នុងការិយាល័យស៊ើបអង្កេតកណ្តាល (CIB)។ មនុស្សយ៉ាងតិច ២៦ នាក់ត្រូវបានចាប់ខ្លួនដោយជាប់ពាក់ព័ន្ធនឹងបណ្តាញឧក្រិដ្ឋកម្ម។ ជនសង្ស័យជាច្រើនគឺមានទំនាក់ទំនងជាមួយនឹងអតីតមហេសី ស្រ៊ីរ៉ាស្មី៕ cen
រាជទាយាទ មហា វិជ្ជរ៉ាឡុងកន និងអតីតមហេសី ស្រ៊ីរ៉ាស្មី
លោកស្រី ស៊ូដាធីប មួងនួន បងស្រីរបស់អតីតមហេសី ស្រ៊ីរ៉ាស្មី ត្រូវតុលាការកាត់ទោសឲ្យជាប់គុក ២ ឆ្នាំកន្លះពីបទប្រមាថស្តេច
