ខេត្តបាត់ដំបង៖ភ្នាក់ងារសារព័ត៌មានក្នុងស្រុកថៃ បានឲ្យដឹងថា ករណីឃាតកម្មយ៉ាងសាហាវនេះបានកើតឡើងនៅវេលាម៉ោង០៨ និង៣០នាទីព្រឹកថ្ងៃទី១៦ ខែកុម្ភៈ ឆ្នាំ២០១៧ ត្រង់ចំណុចក្បែរស្ថានីយតម្រួតការពារព្រំដែនលេខ១១៥ ក្នុងស្រុកពោងណាំរ៉ន ខេត្តច័ន្ទបុរី ប្រទេសថៃ ទល់មុខនឹងស្រុកកំរៀង ខេត្តបាត់ដំបង។
ប្រភពដដែលបានបន្តថា ក្រោយពេលកើតហេតុ និងបន្ទាប់ពីមានការភ្ញាក់ផ្អើល ជនសង្ស័យដែលជាមនុស្សប្រុស និងជាជនជាតិខ្មែរ បានរត់គេចខ្លួនចូលក្នុងព្រៃតាមខ្សែបន្ទាត់ ព្រំដែនបាត់ស្រមោល។ ដោយឡែក នៅត្រង់ទីតាំងកើតហេតុគេសង្គេតឃើញមានស្ត្រី២នាក់ បានដេកស្លាប់ក្នុងថ្លុកឈាម ក្រោមមុខកាំបិតជាច្រើនកន្លែងនៅលើរាងកាយ។
ប្រភពដដែលបានបន្តថា បន្ទាប់ពីទទួលបានព័ត៌មាននេះភ្លាមក្រុមតម្រួតការពារព្រំដែន បានចេញប្រតិបត្តិការ ដើម្បីតាមប្រមាញ់ទៅលើជនសង្ស័យ ក្នុងភូមិសាស្ត្រខាងលើរហូតចាប់ខ្លួនបានព្រមទាំងបានប្រគល់ទៅ ឲ្យកម្លាំងជំនាញស្រុកពោងណាំរ៉ន ខេត្តច័ន្ទបុរី ក្នុងការនាំខ្លួនយកទៅសាកសួរអំពីដំណើររឿង និងមូលហេតុដែលឈានដល់ការ ចាក់សំលាប់គ្នាបែបនេះ។
បច្ចុប្បន្ន នៅមិនទាន់ទទួលបានចម្លើយសារភាពអំពីអត្តសញ្ញាណរបស់ស្ត្រីរងគ្រោះ និងឃាតករ ព្រមទាំងមូលហេតុនោះនៅឡើយទេ៕
