ផ្ទះប្រជាពលរដ្ឋជាង២០ខ្នងរលំ និងប៉ើងដំបូលដោយសារខ្យល់កន្ត្រាក់
រាជធានីភ្នំពេញ៖ផ្ទះប្រជាពលរដ្ឋនៅខេត្តប៉ៃលិនចំនួន៧ខ្នង និងផ្ទះប្រជាពលរដ្ឋនៅខេត្តបាត់ដំបងចំនួន២០ខ្នង បានរងផលប៉ះពាល់ពីឥទ្ធិពលភ្លៀងកក់ខែ លាយឡំជាមួយនឹងខ្យល់កន្ត្រាក់ កាលពីថ្ងៃទី១៣ ខែមីនា ឆ្នាំ២០១៧ ដោយផ្ទះខ្លះបានប៉ើងដំបូល និងខ្លះទៀតបានរលំ។
ក្រុមអាជ្ញាធរបានឲ្យដឹងថា ភ្លៀងកក់ខែធ្លាក់ លាយឡំនឹងខ្យល់កន្ត្រាក់ បណ្តាល ឱ្យប៉ើងដំបូលផ្ទះរបស់ បងប្អូនប្រជាពលរដ្ឋចំនួន ៧ខ្នង នៅក្នុងឃុំសាលាក្រៅ ស្រុកសាលាក្រៅ ខេត្តប៉ៃលិន ។ ដោយឡែក ផ្ទះប្រជាពលរដ្ឋស្ថិតក្នុងភូមិរការបុស្ស ឃុំកំរៀង និងភូមិផ្លូវប្រាំមួយ ឃុំតាក្រី ស្រុកកំរៀង ខេត្តបាត់ដំបង នៅថ្ងៃដូចគ្នានេះ មានករណីគ្រោះធម្មជាតិ បង្កឡើងដោយ ខ្យល់កន្ត្រាក់ ធ្វើឲ្យរលំផ្ទះចំនួន ២០ខ្នងផងដែរ៕
