ខេត្តសៀមរាប៖បុរសម្នាក់បានស្លាប់ភ្លាមៗ ក្នុងករណីគ្រោះថ្នាក់ចរាចរណ៍ដ៏រន្ធត់មួយ ដែលបង្កឡើងដោយរថយន្តម៉ាកហ៊ីណូ និងម៉ាកធុនដ្រា (Tundra) បុកគ្នា លើផ្លូវជាតិលេខ៦ កាលពីវេលាម៉ោង៦ និង៣០នាទី យប់ថ្ងៃទី១៦ ខែមីនា ឆ្នាំ២០១៧ ត្រង់ចំណុចភូមិត្រពាំង ថ្នល់ ឃុំកន្ទ្រាំង ស្រុកប្រាសាទបាគង ខេត្តសៀមរាប។
យោងតាមសមត្ថកិច្ច បានឲ្យដឹងថា មុនពេលកើតហេតុ រថយន្តម៉ាកហ៊ីណូ ពណ៌ស ពាក់ស្លាកលេខ ព្រះសីហនុ 4A-2309 សណ្តោង ស៊ីម៉ង់ KCement ( ខេ ស៊ី មិន) បានធ្វើដំណើរពីលិចទៅកើត ដល់ចំណុចកើតហេតុខាងលើ បានបុកជាមួយរថយន្ត Tundra ពណ៌ស ស៊េរី២០១០ ពាក់ស្លាកលេខភ្នំពេញ 2Z-1918 បើកបរដោយឈ្មោះ លាង គឹមស្រ៊ូ ភេទប្រុស អាយុ៤៩ឆ្នាំ អតីតអ្នកប្រមូលផល អនុផលព្រៃឈើ ពីដីក្រុមហ៊ុនសម្បទានសង្គមកិច្ច រស់នៅភូមិព្រែកតានូង ឃុំព្រៃកតានូង ស្រុកកោះសូទិន ខេត្តកំពង់ចាម (ស្លាប់នៅក្នុងរថយន្ត)៕
