អាមេរិក៖កាលពីម្សិលមិញប្រធានាធិបតីអាមេរិកលោក ដូណល ត្រាំ បានព្រមានថា សហរដ្ឋអាមេរិកបានត្រៀមខ្លួនរួចរាល់ហើយ ក្នុងការចាត់វិធានការឯកតោភាគីក្នុងការដោះស្រាយបញ្ហាអាវុធនុយក្លេអ៊ែរបស់កូរ៉េខាងជើង ហើយអំពាវនាវឲ្យចិនជួយគាំទ្រ។
ថ្លែងប្រាប់សារព័ត៌មាន Financial Times លោកត្រាំ ថា លោកនឹងជួបជាមួយមេដឹកនាំចិន លោក ស៊ី ជីនពីង នៅថ្ងៃព្រហស្បតិ៍ និងថ្ងៃសុក្រសប្តាហ៍នេះនៅសហរដ្ឋអាមេរិក ហើយឱកាសនោះនឹងមានការជជែកពីបញ្ហាអាវុធនុយក្លេអ៊ែរបស់កូរ៉េខាងជើង។ ទន្ទឹមនោះលោកបញ្ជាក់ថា អ្វីគ្រប់យ៉ាងនឹងបានផលល្អបើសិនជាមានការជួយ ឬមិនមានការរារាំងពីសំណាក់រដ្ឋាភិបាលចិន។
គួរបញ្ជាក់ថា កូរ៉េខាងជើងបានបាញ់សាកល្បងអាវុធនុយក្លេអ៊ែចំនួន៥ដងមកហើយគិតចាប់រយៈពេល២ឆ្នាំកន្លងទៅនេះ ដែលធ្វើឲ្យភាពតានតឹងកាន់តែកើនឡើងខ្លាំង៕
