ភ្នំពេញ៖ ចៅក្រមតុលាការសាលាដំបូងរាជធានីភ្នំពេញ បានចេញដីកា សម្រេចលើកថ្ងៃបើកសវនាការលើករណីលោកមាជ សុវណ្ណារ៉ា ប្រធានផ្នែកផ្សព្វផ្សាយរបស់គណបក្សសង្គ្រោះជាតិ និងសកម្មជនគណបក្សសង្គ្រោះជាតិ សរុប១១រូប ក្នុងសំណុំរឿងបាតុកម្មរំដោះទីលានប្រជាធិបតេយ្យ ថ្ងៃទី១៥កក្កដា ឆ្នាំ២០១៤។
លោក ជួង ជួងី មេធាវីការពារក្តីសកម្មជនគណបក្សសង្គ្រោះជាតិ ៥រូប រួមទាំងលោកមាជ សុវណ្ណារ៉ា បានឲ្យដឹងនៅព្រឹកថ្ងៃ ទី២២ខែកុម្ភៈថា ចៅក្រមបានចេញដីកា សម្រេចលើកថ្ងៃបើកសវនាការលើករណីសកម្មជនគណបក្សសង្គ្រោះជាតិ កាលពីថ្ងៃទី២០ខែកុម្ភៈ ហើយដីកានោះ បានមកដល់រូបលោកជាមេធាវី នៅថ្ងៃទី២១ខែកុម្ភៈ។ ក្នុងដីកា មិនបានបញ្ជាក់ពីមូលហេតុនៃការលើកពេលសវនាការ ដែលពីមុនគ្រោងនឹងបើកធ្វើនៅថ្ងៃទី២៣ខែកុម្ភៈនោះទេ ហើយក៏មិនបានកំណត់កាលបរិច្ឆេទថ្មីឡើយ។
សូមរម្លឹកថា លោកមាជ សុវណ្ណារ៉ា ថ្នាក់ដឹកនាំជាន់ខ្ពស់គណបក្សសង្គ្រោះជាតិ ត្រូវបានចាប់ឃុំខ្លួន កាលពីថ្ងៃទី១១ ខែវិច្ឆិកា ឆ្នាំ២០១៤ ពាក់ព័ន្ធនឹងសំណុំរឿងបាតុកម្មរំដោះទីលានប្រជាធិបតេយ្យ ថ្ងៃទី១៥កក្កដា ឆ្នាំ២០១៤ ហើយកើតមានអំពើហិង្សា វាយតប់រវាងបាតុករ និងក្រុមកងសន្តិសុខរាជធានីភ្នំពេញ។ សកម្មជនគណបក្សសង្គ្រោះជាតិ សរុប៤នាក់ ផ្សេងទៀត ត្រូវបានចាប់ឃុំខ្លួន នៅពន្ធនាគារព្រៃស ជាបន្តបន្ទាប់។ ចំណែកសកម្មជនគណបក្សសង្គ្រោះជាតិ ៦រូបផ្សេងទៀត ក៏ជាប់ចោទក្នុងរឿងដូចគ្នានេះ តែស្ថិតនៅក្រៅឃុំ។
សូមរម្លឹកថា នៅក្នុងសំណុំរឿងធ្វើបាតុកម្មរំដោះទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ ក៏មានអ្នកតំណាងរាស្ត្រគណបក្សសង្គ្រោះជាតិ ចំនួន៧រូបជាប់ចោទផងដែរ។ ប៉ុន្តែក្រោយពីការចរចានយោបាយ សម្រេចបានជាកិច្ចព្រមព្រៀងរវាងថ្នាក់ដឹកនាំកំពូលគណបក្សប្រជាជន កម្ពុជា និងសង្គ្រោះជាតិ កាលថ្ងៃទី២២ខែកក្កដា ឆ្នាំ២០១៤ អ្នកតំណាងរាស្ត្រទាំងនោះ ត្រូវបានដោះលែង ហើយបានស្បថ ចូលកាន់តំណែង ដោយមានអភ័យឯកសិទ្ធិសភា នាំឲ្យតុលាការ មិនអាចអនុវត្តនូវការចោទប្រកាន់នោះបានទេនៅពេលនេះ។
សូមបញ្ជាក់ថា សំណុំរឿងក្តីនេះ ត្រូវតុលាការសាលាដំបូងរាជធានីភ្នំពេញ បានបើកសវនាការ កាត់ក្តីម្តងរួចហើយ កាលពីថ្ងៃទី២៥ ខែធ្នូ ឆ្នាំ២០១៤ និងបន្តមកថ្ងៃទី៨ ខែមករា ឆ្នាំ២០១៥ ប៉ុន្តែកាលណោះ ដោយសារតែមានវត្តមានរបស់អ្នកតំណាងរាស្ត្រគណបក្សសង្គ្រោះជាតិ មួយចំនួន ដែលជាប់ចោទក្នុងសំណុំរឿងក្តីបាតុកម្មកើតអំពើហិង្សានោះ ក្នុងបន្ទាប់សវនាការ ហើយចៅក្រម បានកំណត់ឲ្យតំណាងរាស្ត្រទាំងនោះ ចេញពីបន្ទប់សវនាការ ក៏នាំឲ្យមានការផ្អាកសវនាការ។ក្រោយមក ចៅក្រម កំណត់ថា នឹងបើកសវនាការលើអង្គសេចក្តីក្នុងរឿងនេះ នៅថ្ងៃទី២៣កុម្ភៈ៕fpm
