ដោយ៖កូននាគកំណាច
ក្រចេះ៖ទីតាំងសិប្បកម្មកែច្នៃឈើមួយកន្លែង ឋិតនៅចំណុចក្រោយបន្ទាយកងរាជអាវុធហត្ថខេត្តក្រចេះ ក្នុងភូមិស្រែស្ដៅ សង្កាត់អូរឬស្សី ក្រុងក្រចេះ ត្រូបានអគ្គីភ័យឆាប់ឆេះទាំងស្រុង កាលពីវេលាម៉ោង១១និង២៥នាទីថ្ងៃទី៣០ ខែមេសា ឆ្នាំ២០១៧។
សាក្សីនៅកន្លែងកើតហេតុបានឲ្យដឹងថា ទីតាំងខាងលើជាកន្លែងសិប្បកម្មកែច្នៃឈើ និងមានផ្ទុកធុងហ្គាសជាច្រើនធុង។ ប្រភពបន្តថា មុនពេលកើតហេតុគេឃើញមានផ្សែងហុយចេញពីខាងក្នុងមិនបានប៉ុន្មាននាទីផង ក៏មានផ្ទុះធុងហ្គាសជាបន្តបន្ទាប់ ស្រាប់តែមានអណ្ដាតភ្លើងឆាប់ឆេះយ៉ាងសន្ធរសន្ធៅតែម្តង។
សមត្ថកិច្ចបានឲ្យដឹងថា រោងសិប្បកម្មកែច្នៃខាងលើ ប្តីឈ្មោះ ហេង ស្រុង អាយុ៣៨ឆ្នាំ និងប្រពន្ធឈ្មោះ សុខ លី អាយុ២៥ឆ្នាំ។
លោកឧត្តមសេនីយ៍ ច្រឹង ផល្លី ស្នងការរងទទួលផែនអគ្គិភ័យ បានឲ្យដឹងថា មូលហេតុដែលបង្កឲ្យមានអគ្គីភ័យឆាប់ឆេះ គឺបណ្ដាលមកពីផ្ទុះធុងហ្គាសដែលម្ចាស់ផ្ទះស្តុកទុក ហើយបង្កឲ្យខូចខាត់ទ្រព្យសម្បត្តិ៍ជាង១ម៉ឺនដុល្លារ។
លោកឧត្តមសេនីយ៍ បានបន្តថា អគ្គីភ័យបានរាល់ដាលដល់ដំបូលផ្ទះអ្នកជិតខាង ប៉ុន្តែត្រូវបានរថយន្តពន្លត់អគ្គិភ័យជួយអន្តរាគមន៍របស់ស្នងការនគរបាលខេត្ត ជួយបាញ់ពន្លត់បានទាន់ពេលវេលា ដោយប្រើប្រាស់ទឹកអស់ចំនួន ១៥ឡាន។
សូមបញ្ជាក់ថា ក្នុងហេតុការគ្រោះអគ្គិភ័យខាងលើនេះមិនមានប៉ះពាល់ដល់ប្រជាពលរដ្ឋឡើយ៕
