លីប៊ី៖ទីភ្នាក់ងាររបស់អង្គការសហប្រជាជាតិបានឲ្យដឹងកាលពីថ្ងៃចន្ទដោយលើកឡើងពីសំដីអ្នកនៅរស់រានមានជីវិតក្នុងសោកនាដកម្មចុងក្រោយបំផុតមួយថា ជនឥន្តោប្រវេសន៍១១នាក់បានស្លាប់និងជិត២០០នាក់កំពុងបាត់ខ្លួនក្រោយពេលទូកចំនួនពីរបានលិចជិតឆ្នេរប្រទេសលីប៊ី។
អ្នកនៅរស់រានមានជីវិតចំនួន៥០នាក់ត្រូវបានជួយសង្គ្រោះដោយនាវាដឹកកុងតឺន័ររបស់ដាណឺម៉ាកដែលមានឈ្មោះថា Alexander Maersk ដែលត្រូវបានជូនដំណឹងឲ្យបង្វែរទិសដោយឆ្មាំសមុទ្រអ៊ីតាលីហើយបានដាក់ពួកគេចុះនៅតំបន់ Pozzallo ភាគខាងត្បូងទីក្រុង Sicily ។
តំណាងរបស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) និងអង្គការទេសន្តរប្រវេសន៍អន្តរជាតិ (IOM) បានទៅជួបពួកគេនៅថ្ងៃចន្ទដើម្បីរឿងរ៉ាវកើតឡើង។
អ្នកនៅរស់រានមានជីវិតបានប្រាប់ពួកគេថា ស្ត្រីនិងកុមារគឺស្ថិតក្នុងចំណោមអ្នកបាត់ខ្លួន។នៅពេលជាមួយគ្នានោះ សាកសពស្ត្រីចំនួន១០នាក់និងកុមារម្នាក់ត្រូវបានគេរកឃើញកាលពីថ្ងៃចន្ទនៅលើឆ្នេរសមុទ្រក្នុងទីក្រុង Zawiya ដែលមានចម្ងាយ៥០គីឡូម៉ែត្រពីភាគខាងលិចរដ្ឋធានី Tripoli ។ នេះបើយោងតាមការឲ្យដឹងពីមន្ត្រីម្នាក់នៃអឌ្ឍចន្ទក្រហមលីប៊ី។
កាលពីថ្ងៃអាទិត្យ ជនចំណាកស្រុកប្រាំពីរនាក់ដែលក្នុងនោះមានស្ត្រីម្នាក់និងបុរសប្រាំមួយនាក់ត្រូវបានជួយសង្គ្រោះដោយអ្នកនេសាទលីប៊ីនិងឆ្មាំសមុទ្រជិតឆ្នេរនៃរដ្ឋធានីរបស់លីប៊ី។
អ្នកនាំពាក្យរបស់អង្គការ IOM ដែលបានជួបជាមួយពួកគេបាននិយាយថា ពួកគេបានចេញដំណើរនៅលើទូកមួយដែលមានមនុស្សយ៉ាងហោចណាស់១២០នាក់ដោយក្នុងចំណោមនោះមានស្ត្រីប្រហែល៣០នាក់និងកុមារចំនួនប្រាំបួននាក់។
សរុបទាំងអស់ ជនឥន្តោប្រវេសន៍ជាង៦,០០០នាក់ត្រូវបានជួយសង្គ្រោះនៅសុក្រនិងថ្ងៃសៅរ៍ក្នុងដែនទឹកអន្តរជាតិជិតឆ្នេរសមុទ្រប្រទេសលីប៊ីនិងត្រូវបាននាំយកទៅកាន់ប្រទេសអ៊ីតាលីខណៈដែលមនុស្សរាប់រយនាក់ទៀតត្រូវបានជួយសង្គ្រោះនៅក្នុងដែនទឹករបស់ប្រទេសលីប៊ីហើយបាននាំយកត្រឡប់ទៅប្រទេសលីប៊ីវិញ៕
