ខេត្តកំពត ៖ មានគ្រោះថ្នាក់ចរាចរណ៍មួយបានកើតឡើង ដោយមានរថយន្តដឹកដីមួយគ្រឿងបានបើកកាត់ក្បួនហែហមរថយន្តរបស់សម្តេចក្រុមព្រះ បណ្តាលឲ្យរថយន្តមួយគ្រឿងធ្លាក់ចូលស្រែតែម្តង។ ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង០៥ និង៣០នាទីល្ងាចថ្ងៃទី១៦ ខែឧសភា ឆ្នាំ២០១៧ ស្ថិតនៅចំណុចភូមិព្រៃតាព្រឹក ឃុំស្ដេចគង់ខាងលិច ស្រុកបន្ទាយមាស ខេត្តកំពត។
តាមប្រភពព័ត៌មានបានឲ្យដឹងទៀតថា គ្រោះថ្នាក់ចរាចរណ៍នេះបានកើតឡើង ខណៈពេលដែលសម្តេចក្រុមព្រះ នរោត្តម រណប្ញទ្ធិ និងក្បួនហែហមរថយន្តរបស់សម្តេច បានធ្វើដំណើរត្រលប់មកពីជួបសំណេះសំណាលជាមួយក្រុមអ្នកគាំទ្រវិញ។ រថយន្តដែលជួបគ្រោះថ្នាក់នោះគឺជារថយន្តម៉ាករបស់អនុប្រធានគណបក្សហ្វ៊ុនស៊ិនប៉ិច លោក ឈឹម ចំរើន ម៉ាកឡិចស៊ីច ៤៧០ ពណ៌ស្ករ ពាក់ស្លាកលេខភ្នំពេញ 2J-9055 ចំណែកឯរថយន្តរបស់សម្តេចក្រុមព្រះមិនបានជួបគ្រោះថ្នាក់ឡើង ហើយក៏បន្តដំណើរទៅមុខទៀត។
រីឯរថយន្តបង្កវិញ បន្ទាប់ពីបង្កគ្រោះថ្នាក់ហើយបានបន្ថែមល្បឿនរត់គេចខ្លួនទៅមុខប្រមាណ២គីឡូម៉ែត្រក៏ត្រូវបានសមត្ថកិច្ចឃាត់ជាប់ និងបញ្ជូនអធិការរដ្ឋាននគរបាលស្រុកបន្ទាយមាស ដើម្បីចាត់ការតាមច្បាប់៕
