ការ៉ាកាស ៖ យោងតាមសេចក្តីរាយការណ៍ពីទីភ្នាក់ងារសារព័ត៌មាន Reuters នៅព្រឹកថ្ងៃពុធនេះបានឲ្យដឹងថា បាតុកម្មតវ៉ាដ៏ហិង្សាប្រឆាំងរដ្ឋាភិបាលវេណេស៊ុយអេឡារយៈពេលជាង០៦សប្ដាហ៍មកនេះបានបណ្តាលឲ្យមនុស្សស្លាប់កើនឡើងដល់៤២នាក់ហើយ ខណៈមនុស្ស៩០នាក់បន្ថែមទៀតត្រូវបានចាប់ខ្លួនកាលពីថ្ងៃចន្ទសប្តាហ៍នេះ។
ការិយាល័យរដ្ឋអាជ្ញាវេណេស៊ុយអេឡាបានឱ្យដឹងថា ប៉ូលិសម្នាក់ត្រូវបានចាប់ខ្លួនដោយជាប់សង្ស័យថា បានបាញ់សម្លាប់អ្នកបើកបររថយន្ដតាក់ស៊ីអាយុ៣៣ឆ្នាំម្នាក់ នៅក្នុងរដ្ឋ Tachira ខណៈដែលមនុស្សម្នាក់ទៀតអាយុ១៧ឆ្នាំ ក៏បានស្លាប់ដោយសារតែត្រូវនឹងគ្រាប់កាំភ្លើងផងដែរ។ ចំណែកជនរងគ្រោះម្នាក់ផ្សេងទៀត បានស្លាប់នៅក្នុងបាតុកម្មតវ៉ា នៅឯទីក្រុង San Antonio។
ជុំវិញបាតិកម្មនេះប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បានទម្លាក់ការទទួលខុសត្រូវលើក្រុមគណបក្សប្រឆាំង ដែលជាអ្នកបង្កឲ្យមានវិបត្តិដូចពេលបច្ចុប្បន្ន ក៏ដូចជាការស្លាប់របស់ក្រុមបាតុករ ដែលលោកចាត់ទុកថា មានចេតនាទម្លាក់លោកពីតំណែង ដោយមានការគាំទ្រពីគណបក្សប្រឆាំង មានសហរដ្ឋអាមេរិកជាខ្នងបង្អែក៕
