Jaycee Chan តារាភាពយន្តហុងកុង ដែលទើបត្រូវបានដោះលែងឲ្យមានសេរីភាពវិញកន្លងទៅថ្មីៗនេះ បន្ទាប់ពីជាប់គុក ៦ ខែ ពីបទប្រើប្រាស់គ្រឿងញៀន , បានបង្ហោះរូបថត២សន្លឹកនៅលើ Sina Weibo -១គឺបង្ហាញឲ្យឃើញរូបគេកំពុងត្រូវបានឪពុក (ឈិន ឡុង ឬ Jackie Chan) កាត់សក់ឲ្យ និង១ទៀតបង្ហាញឲ្យឃើញម៉ូដសក់ថ្មីរបស់គេ ។
Jyacee អាយុ ៣២ ឆ្នាំ បានសរសេរចំណងជើងក្រោមរូបភាពឪពុកខ្លួនកាត់សក់ឲ្យថា “វាជាជីវិតចាប់ផ្តើមថ្មី” ។
រឿងគួរឲ្យភ្ញាក់ផ្អើលនេះ ត្រូវបានគេជឿថា លោក ឈិន ឡុង បានកាត់សក់កូនប្រុសដើម្បីឲ្យជ្រះចង្រៃនេះ គឺធ្វើឡើងនៅក្នុងអំឡុងបុណ្យចូលឆ្នាំថ្មីប្រពៃណីចិន ។
ទន្ទឹមនេះផងដែរ អ្នកលេងអ៊ីនធើរណេតមួយចំនួន បាន Comment លើកឡើងដូចជាថា “សូមកុំឲ្យឪពុកម្តាយអាប់ឱនកិត្តិយសទៀតទៅ!”, “សូមកែចិត្តគំនិតថ្មី”, “ចាប់ពីពេលនេះទៅ គួរធ្វើជាមនុស្សល្អ” ។
គួររម្លឹកផងដែរថា Jyacee ត្រូវបានចាប់ខ្លួនដាក់គុក ៦ ខែ បន្ទាប់ពីគាត់ត្រូវបានរកឃើញទោសទណ្ឌប្រើប្រាស់គ្រឿងញៀន និងផ្តល់កន្លែងឲ្យអ្នកដទៃសេពគ្រឿងញៀន នៅផ្ទះរបស់ខ្លួនក្នុងទីក្រុងប៉េកាំង ។
គាត់ត្រូវបានដោះលែងឲ្យមានសេរីភាពវិញ ពីមជ្ឈមណ្ឌលឃុំខ្លួន Dongcheng កាលពីថ្ងៃទី ១៤ កុម្ភៈ កន្លងមកនេះ ៕
