ភ្នំពេញ ៖ ជនសង្ស័យម្នាក់បន្ទាប់ពីចូលធ្វើសកម្មភាពលួចទ្រព្យសម្បត្តិក្នុងផ្ទះអ្នកស្រុក ពេលម្ចាស់មកទាន់វាយតដៃបណ្តាលឲ្យម្ចាស់ផ្ទះរងរបួស ហើយព្យាយាមរត់គេច ត្រូវបានបងប្អូនប្រជាពលរដ្ឋនិងកម្លាំនគរបាលប៉ុស្តិ៍ភ្លើងឆេះរទេះ នៅក្បែរនោះអន្តរាគមន៍ ដេញតាមចាប់បាន ពលរដ្ឋស្វាគមន៍មួយដៃមួយជើងបែកក្បាល រួចប្រគល់ជូននគរបាលប៉ុស្តិ៍ចោមចៅ ។ ហេតុការណ៍ខាងលើកើតឡើងកាលពីវេលាម៉ោង១០ និង១០នាទីព្រឹកថ្ងៃទី០៩ ខែមិថុនា ឆ្នាំ២០១៧ ស្ថិតនៅតាមផ្លូវ៣០ម៉ែត្រ ភូមិព្រៃកំបុត សង្កាត់ចោមចៅ ខណ្ឌពោធិសែនជ័យ ។
ជនសង្ស័យដែលចាប់ឃាត់ខ្លួនបាន មានឈ្មោះ ឡាង រិទ្ធ ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅភូមិជម្ពូវ័ន សង្កាត់ចោមចៅ ខណ្ឌពោធិសែនជ័យ មានស្រុកកំណើតនៅខេត្តកំពង់ស្ពឺ ។ ចំណែកជនរងគ្រោះ មានឈ្មោះ ឆាង សុធី ភេស្រី អាយុ ៣១ឆ្នាំ ស្នាក់នៅផ្ទះកើតហេតុ មានស្រុកកំណើត ភូមិភ្នំលាវ សង្កាត់ពងទឹក ខណ្ឌតំណាក់ចង្អើរ ក្រុងកែប ។
តាមប្រភពបានឲ្យដឹងថា មុនកើតហេតុខណៈដែលម្ចាស់ផ្ទះមិននៅ ទៅលក់ដូរនៅផ្សារ ស្រាប់នៅវេលាម៉ោងខាងលើ ជនសង្ស័យបានគាស់ទ្វារចូលលួចទ្រព្យសម្បត្តិ បានលុយកាក់មួយចំនួន បន្ទោងខ្សែក ទូរស័ព្ទដៃចំនួន៣គ្រឿង បានសម្រេចហើយ ត្រូវបានម្ចាស់រួមជាមួយប្អូនប្រុសម្នាក់ទៀត មកទាន់ធ្វើឲ្យជនសង្ស័យស្លន់ ស្រវ៉ាបានដែកបំពង់ទីប កាន់គ្រវីមិនឲ្យជនរងគ្រោះចូលជិត ហើយក៏ត្រូវជនរងគ្រោះបណ្តាលឲ្យរងរបួស រួចជនសង្ស័យព្យាយាមរត់គេច បានចំងាយជាង១០០ម៉ែត្រ បន្ទាប់ពីជនរងគ្រោះស្រែកចោរៗ ត្រូវបានបងប្អូនប្រជាពលរដ្ឋ និងកម្លាំងនគរបាលប៉ុស្តិ៍ចោមចៅ នៅ ក្បែរស្រាប់ ចេញជួយអន្តរាគមន៍ ដេញតាមចាប់បាន ពលរដ្ឋចាប់ស្វាគមន៍ មួយដៃមួយជើងរងរបួសបែកក្បាល រួចប្រគល់ជូននគរបាលប៉ុស្តិ៍ចោមចៅ ។
ជនរងគ្រោះក្រោយកើតហេតុ ក្នុងស្ថានភាពរបួសត្រូវបានក្រុមគ្រួសារ ដឹកយកទៅពេទ្យព្យាបាលរបួស រីឯជនសង្ស័យត្រូវបាននាំទៅសាកសួរនៅប៉ុស្តិ៍ចោមចៅ ដើម្បីកសាងសំណុំចាត់ការទៅតាមនីតិវិធី ៕
