ព័រទុយហ្កាល់ ៖ អាជ្ញាធរព័រទុយហ្កាល់បានបញ្ជាក់ថា គិតត្រឹមយប់ថ្ងៃអាទិត្យម្សិលមិញមនុស្សស្លាប់៤៣នាក់ និង៥៩នាក់ផ្សេងទៀតរងរបួសក្នុងសោកនាដកមួយដ៏គួរឱ្យរន្ធត់ដោយសារភ្លើងឆេះព្រៃដ៏សន្ធោសន្ធៅនៅតំបន់ Leiria ភាគកណ្ដាលនៃប្រទេសព័រទុយហ្កាល់។នេះបើយោងតាមសារព័ត៌មាន BBC។
នាយករដ្ឋមន្ត្រីព័រទុយហ្កាល់ លោក Antonio Costa បានថ្លែងថា «យើងកំពុងប្រឈមមុខ នឹងសោកនាដកមួយដ៏គួរឱ្យរន្ធត់ដោយ មកទល់ពេលនេះមានមនុស្ស២៤នាក់ ហើយបានស្លាប់ ប៉ុន្តែចំនួននេះអាចនឹងកើនឡើង ច្រើនជាងនេះ»។ ជាមួយគ្នានោះដែរ បើតាមក្រុមអ្នកពន្លត់អគ្គិភ័យ ជនរងគ្រោះភាគច្រើន បានស្លាប់ នៅអំឡុងពេលព្យាយាមរត់គេច ចេញតំបន់ Pedrogao Grande ស្ថិតនៅចំងាយ៥០គីឡូម៉ែត្រ ពីភាគអាគ្នេយ៍ទីក្រុង Coimbra។
អាជ្ញាធរបញ្ជាក់ថា ភ្លើងឆេះព្រៃនេះបានកើតឡើងនៅម៉ោងប្រមាណ ១៥ និង០០នាទី (ម៉ោងនៅក្នុងតំបន់) កាលពីថ្ងៃសៅរ៍ នៅឯតំបន់ Pedrogao Grande នៃស្រុក Leiria។ ចំណែកឯ មូលហេតុនៃអគ្គិសភ័យ ពុំទាន់ត្រូវបានបញ្ជាក់នៅឡើយទេ ខណៈដែលក្រុមភ្នាក់ពន្លត់អគ្គិភ័យ ១៧០០នាក់ កំពុងតស៊ូប្រយុទ្ធនឹងអណា្តតភ្លើង៕
