ញូដេលី ៖ អគ្គរដ្ឋទូតកូរ៉េខាងជើងប្រចាំងប្រទេសឥណ្ឌា លោក Kye Chun Yong បានអះអាងថា កូរ៉េខាងជើងនឹងផ្អាកការបាញ់សាកល្បងមីស៊ីល និងអាវុធនុយក្លេអ៊ែរ បើសិនជាសហរដ្ឋអាមេរិក បញ្ឈប់ការធ្វើសមយុទ្ធយោធាជាមួយកូរ៉េខាងត្បូង។ នេះបើយោងតាមសារព័ត៌មាន Sputnik ផ្សាយនៅព្រឹកថ្ងៃព្រហស្បតិ៍ ទី២២ ខែមិថុនា ឆ្នាំ២០១៧នេះ។
លោក Kye Chun Yong បានបញ្ជាក់ថា «យើងអាចនឹងផ្អាកការធ្វើតេស្ដមីស៊ីល ឬអាវុធនុយក្លេអ៊ែររបស់យើង ក្រោមលក្ខខណ្ឌមួយជាក់លាក់… ហើយបើសិនជាសហរដ្ឋអាមេរិក បញ្ឈប់ទាំងស្រុង ឬផ្អាកការធ្វើសមយុទ្ធយោធាជាមួយកូរ៉េខាងត្បូង នោះយើងក៏នឹងធ្វើដូចគ្នានេះដែរ… ឬក៏យើងអាចនឹងទទួលយកកិច្ចចរចា លើប្រធានបទផ្អាកការធ្វើតេស្ដរាល់អាវុធទាំងអស់ទៀតផង»។
ជុំវិញការធ្វើសមយយុទ្ធរបស់អាមេរិក និងកូរ៉េខាងត្បូងនេះផងដែរត្រូវបានលោក Kye Chun Yong លើកឡើងថា ជាសកម្មភាពត្រៀមឈ្លានពានចូលទីក្រុងព្យុងយ៉ាង ដូច្នេះហើយទើបរបបដឹកនាំ លោក គីម ជុងអ៊ុន តែងតែយកលែសនេះបាញ់សាកល្បងមីស៊ីល និងអាវុធនុយក្លេអ៊ែរ ដោយគ្មានកោតក្រែងទណ្ឌកម្មពីសំណាក់ក្រុមប្រឹក្សាសន្តិសុខយូអិន៕
