ខេត្តក្រចេះ ៖ កម្លាំងនគរបាលស្រុកស្នួលឃាត់ខ្លួនជនសង្ស័យម្នាក់ពាក់ព័ន្ធនឹងរណីរក្សាទុកដើម្បីជួញដូរដោយខុសច្បាប់នូវសារធាតុញៀន កាលពីថ្ងៃទី២៨ ខែមិថុនា ឆ្នាំ២០១៧ វេលាម៉ោង១៦ និង១៥នាទី នៅចំណុចវត្តផ្សារស្នួល ភូមិក្បាលស្នួល ឃុំស្នួល ស្រុកស្នួល ខេត្តក្រចេះ ។
លោកវរសេនីយ៍ឯក ចាន់ សុគីម អាធិការនគរបាលស្រុកស្នួលបានឲ្យដឹងថា ជនសង្ស័យឈ្មោះ អ៊ាន ផល្លា ភេទប្រុស អាយុ២០ឆ្នាំ ជនជាតិខ្មែរ រស់នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ ។ លោកអធិការបន្តថា នៅថ្ងៃទី២៨ ខែមិថុនា ឆ្នាំ២០១៧ វេលាម៉ោង១៦និង១៥នាទី កម្លាំងជំនាញនៃអធិការដ្ឋាននគរបាលស្រុកស្នួល បានធ្វើការចុះដើរល្បាតតាមគោលដៅនិងបានធ្វើការឃាត់ខ្លួនមុខសញ្ញាម្នាក់ឈ្មោះ អ៊ាន ផល្លា តាមដីកាបង្គាប់អោយនាំខ្លួនរបស់ចៅក្រមសើបសួរ ឌិន ស៊ីវុទ្ធី។
លោកបញ្ជាក់ថា បន្ទាប់មកសមត្ថកិច្ចក៏បានធ្វើការឆែកឆេរក្នុងខ្លួនបានរកឃើញវត្ថុតាង រួមមាន ៖ ១/ម្សៅក្រាមពណ៌ស រាងដូច ប៊ីចេង សង្ស័យជាគ្រឿងញៀនប្រភេទមេតំហ្វេតាមីនតូចធំ ចំនួន០៤កញ្ចប់។ ២/ដែកកេះចំនួន០១។ ៣/កាបូបដៃពណ៌ឈាមជ្រូកចំនួន០១។ ៤/ថង់ក្រណាត់ពណ៌ខ្មៅ(សំរាប់ទុកគ្រឿងញៀន ) ចំនួន០១។ ៥/កាតធនារគារ ចំនួន០១(មុខសញ្ញាខាងលើនេះជាមុខសញ្ញាចាស់ដែលសមត្ថកិច្ចកំពង់តាមដាន)។
បច្ចុប្បន្នជនសង្ស័យឈ្មោះ អ៊ាន ផល្លា និងវត្ថុតាង ត្រូវបានសមត្ថកិច្ចយើងធ្វើការឃាត់ខ្លួនជាបណ្ដោះអាសន្ននៅអធិការដ្ឋាននគរបាលស្រុកស្នួល ដើម្បីកសាងសំណុំរឿងតាមនីតិវិធី៕
