ដោយ ៖ ប្រុញ វិធិន
ខេត្តក្រចេះ ៖ សកម្មជនចែកចាយគ្រឿងញៀនទ្រង់ទ្រាយធំម្នាក់ នៅស្រុកឆ្លូងរួមនឹងវត្ថុតាំងគ្រឿងញៀនមួយចំនួនធំ ត្រូវបានសមត្ថកិច្ចបញ្ជូនខ្លួនទៅកាន់សាលាដំបូងខេត្តក្រចេះ នាព្រឹកថ្ងៃទី៣០ ខែមិថុនា ឆ្នាំ២០១៧នេះ ។
លោក គង់ ស៊ីដន ប្រធានការិយាល័យប្រឆាំងការជួញដូរគ្រឿងញៀននៃស្នងការដ្ឋាននគរបាលខេត្ត បានឱ្យដឹងថា ការឃាត់ខ្លួនជនសង្ស័យនេះដោយមានបញ្ជាដឹកនាំផ្ទាល់ពីលោក លន់ សុផាត ស្នងការនគរបាលខេត្ត កំលាំងការិយាល័យប្រឆាំងគ្រឿងញៀន សហការជាមួយកំលាំងអធិការដ្ឋាននគរបាលក្រុងក្រចេះ និងកំលាំងអធិការដ្ឋាននគរបាលស្រុកឆ្លូង ដោយមានការចូលរួមដោយលោក ធុច បញ្ចសន្តិភាព ព្រះរាជអាជ្ញារងអមសាលាដំបូងខេត្តក្រចេះ បានចុះប្រតិបត្តការបង្ក្រាបករណីជួញដូរដោយខុសច្បាប់នូវសារធាតុញៀន នៅចំណុចផ្ទះសំណាក់ម្លប់គគី (បន្ទប់លេខ៧) ស្ថិតក្នុងភូមិជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះ កាលពីរសៀលថ្ងៃទី២៩ ខែមិថុនាឆ្នាំ២០១៧។
ដោយឃាត់ខ្លួនបានជនសង្ស័យចំនួនម្នាក់ ឈ្មោះ វ៉ន ពុំ ភេទប្រុស អាយុ៤៤ឆ្នាំ ជនជាតិខ្មែរ មានទីលំនៅភូមិ១ ឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ។ ដកហូតបានវត្ថុតាងរួមមាន ម្ស៉ៅក្រាមពណ៌សចំនួន ០៣កញ្ចប់តូច-ធំនិងឧបករណ៌សំរាប់ជក់គ្រឿងញៀនមួយចំនួនហើយម៉ូតូចំនួន០១គ្រឿង (ម៉ាកវេវ S ពណ៌ខ្មៅ លេខតួៈ 052480) ជាមួយទូរសព្ទ័ដៃចំនួន០១គ្រឿង(ម៉ាក Huawei ពណ៌ទឹកមាស)និងនិងប្រាក់រៀលចំនួន ១៦ម៉ឺនរៀល៕
