ភ្នំពេញ: ប្រជាពលរដ្ឋរស់នៅភូមិព្រែកតាគង់២ និងភូមិព្រែកតាគង់៣ ដែលស្ថិតក្នុងសង្កាត់ ចាក់អង្រែលើ ខណ្ឌមានជ័យ បាននាំធ្វើបាតុកម្ម ប្រឆាំងតវ៉ាទៅនឹងក្រុមហ៊ុនឯកជនមួយ ដែលបានធ្វើរបងស័ង្កសី បិទផ្លូវប្រជាពលរដ្ឋ មិនឲ្យធ្វើដំណើរ ដោយសារតែមាន ឧកញ៉ា ឃុន សៀ នៅពីក្រោយខ្នង។
ការធ្វើបាតុកម្មរបស់ ប្រជាពលរដ្ឋ គឺមានការដុតកង់ឡាន និងលើកបដា ស្រែកតវ៉ាទាមទារ ឲ្យក្រុមហ៊ុនបើកផ្លូវ។ ការធ្វើបាតុកម្មនេះ គឺបានឈានចូលដល់ ថ្ងៃទី២ហើយ ចាប់តាំងពីថ្ងៃទី៦ និងថ្ងៃទី៧ ខែមីនា ឆ្នាំ២០១៥។ រហូតមកដល់ពេលនេះ នៅមិនទាន់ មានដំណោះស្រាយនៅឡើយទេ។
នៅក្នុងការធ្វើបាតុកម្ម ប្រជាពលរដ្ឋ បានសម្តែងការខឹងសម្បាយ៉ាងខ្លាំង ដោយបានដុតកង់ឡាន និងទាញផ្តួលរំលំ របងស័ង្កសីបិទផ្លូវ មិនឲ្យប្រជាពលរដ្ឋធ្វើដំណើរឆ្លងកាត់។ ចំណែកខាងក្រុមហ៊ុន បានដាក់កងកម្លាំងមួយចំនួននៅក្នុងដីក្រុមហ៊ុន ដោយខ្លាចមានប្រជាពលរដ្ឋសម្រុកចូល។
យោងតាមលិខិតរបស់លោក ពេជ្រ កែវមុនី អភិបាលខណ្ឌមានជ័យ ផ្ញើជូនលោកប៉ា សុជាតិវង្ស អភិបាលរាជធានីភ្នំពេញ បានឲ្យដឹងថា ប្រជាពលរដ្ឋ នៅភូមិព្រែកតាគង់២ និងភូមិព្រែកតាគង់៣ សង្កាត់ចាក់អង្រែលើ ប្រមាណ៥០នាក់ ស្នើសុំអាជ្ញាធរ ជួយអន្តរាគមន៍ បើកផ្លូវទទឹង១០ម៉ែត្រ តភា្ជប់ពីផ្លូវភូមិ មកមហាវិថីសម្តេចហ៊ុន សែន (ផ្លូវ៦០ម៉ែត្រ) កាត់លើដីកម្មសិទ្ធិរបស់លោក ឃុន សៀ និងលោក ធាង ទ្រី តែការស្នើសុំនេះ ពុំទាន់មានការព្រមព្រៀងពីម្ចាស់កម្មសិទ្ធិនៅឡើយទេ។
តំណាងប្រជាពលរដ្ឋ បាននិយាយថា ពួកគាត់តវ៉ានេះ គឺសូមឲ្យក្រុមហ៊ុន បើកផ្លូវវិញ ដើម្បីប្រជាពលរដ្ឋធ្វើដំណើរ។ ប្រជាពលរដ្ឋ មិនមែនចង់តវ៉ាទៅបាញ់បោះ ជាមួយក្រុមហ៊ុនទេ ហើយមិនចាំបាច់ ក្រុមហ៊ុនយកកម្លាំងទាហាន មកតតាំងជាមួយប្រជាពលរដ្ឋទេ៕ CEN
