ភ្នំពេញ ៖ រដ្ឋាភិបាលកម្ពុជា បានចេញសេចក្តីថ្លែងការណ៍ភ្លាមៗ ដោយស្នើឲ្យរក្សាភាពស្ងៀមស្ងាត់ បន្ទាប់ពីសមត្ថកិច្ច បានចាប់ខ្លួនឯកឧត្តម កឹម សុខា ប្រធានគណបក្សសង្គ្រោះជាតិ នៅក្នុងគេហដ្ឋានរបស់លោកនៅខណ្ឌទួលគោក នាវេលាម៉ោង ០០៖៣៥ នាទី រំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២0១៧ នេះ។
លោក កឹម សុខា ត្រូវបានចាប់ខ្លួននៅផ្ទះរបស់លោក ស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក។ ការចាប់ខ្លួននេះមានអង្គរក្សរបស់លោក កឹម សុខា ប្រមាណ៨នាក់ផងដែរ។
តាមរយៈសេចក្តីថ្លែងការណ៍ រដ្ឋាភិបាល បានអះអាងថា ការចាប់ខ្លួនលោក កឹម សុខា គឺស្ថិតក្នុងបទល្មើសជាក់ស្តែង គឺធ្វើឡើងបន្ទាប់ពីវីដេអូមួយ ដែលត្រូវបានផ្សាយដោយបណ្តាញមួយ ឈ្មោះ CBN (Cambodian Broadcasting Network) ដែលលោក កឹម សុខា ប្រធានគណបក្សសង្គ្រោះជាតិ បាននិយាយសារភាពកាលពីថ្ងៃទី០៨ ខែធ្នូ ឆ្នាំ២០១៣ នៅប្រទេសអូស្ត្រាលីថា ខ្លួនបានធ្វើតាមបញ្ជារបស់មហាអំណាចអាមេរិក ក្នុងការរៀបចំផែនការផ្តួលរំលំរាជរដ្ឋាភិបាលកម្ពុជា ដោយយកគំរូទៅនឹងប្រទេសយូហ្គោស្លាវី និងសើប៊ីដែរ។
សេចក្តីថ្លែងការណ៍របស់រាជរដ្ឋាភិបាល បានចាត់ទុកថា តាមរយៈវិដេអូក្លីប ដែលត្រូវបានផ្សព្វផ្សាយដោយបណ្តាញ CBN ដែលមានទីតាំងនៅអូស្ត្រាលី និងភស្តុតាងដទៃទៀត ដែលអាជ្ញាធរមានសមត្ថកិច្ចប្រមូលបាន គឺបានបង្ហាញឲ្យឃើញច្បាស់អំពីផែនការសម្ងាត់នៃ ការឃុបឃិតគ្នារវាងឈ្មោះ កឹម សុខា និងបក្សពួក ជាមួយបរទេស ដែលធ្វើឲ្យប៉ះពាល់ដល់ព្រះរាជាណាចក្រកម្ពុជា។ អំពីនៃការឃុបឃិតគ្នាជាសម្ងាត់ខាងលើនេះ គឺជាអំពើក្បត់ជាតិ។
សារព័ត៌មាន មេគង្គប៉ុស្តិ៍ មិនអាចទាក់ទងអ្នកនាំពាក្យ និងមន្ត្រីផ្សេងទៀត នៃគណបក្សសង្គ្រោះជាតិបានទេ ដោយសារគ្មានអ្នកទទួលទូរស័ព្ទ៕
