ក្រុមជំនាញកម្ពុជា -ជប៉ុន ប្រជុំសិក្សាសង់ផ្លូវរថភ្លើងលើអាកាសនៅភ្នំពេញ
ភ្នំពេញ ៖ គម្រោងដឹកជញ្ជូនដោយរថភ្លើងលើអាកាសនេះ មានចម្ងាយប្រមាណ ១៨គីឡូម៉ែត្រ ពីកណ្តាលរាជធានី ទៅព្រលានយន្តហោះអន្តរជាតិភ្នំពេញ (ពោធិ៍ចិនតុង)។ ចំណែកការសិក្សាលើគម្រោង នឹងប្រើពេលមួយឆ្នាំ។ នេះបើតាមបញ្ជាក់របស់អភិបាលរងរាជធានីភ្នំពេញ លោក អៀង អូននី នៅក្នុងកិច្ចប្រជុំដែលបានធ្វើឡើងនៅសាលារាជធានីភ្នំពេញ កាលពីថ្ងៃទី៦ ខែកញ្ញា កន្លងទៅ។
លោក អៀង អូននី បញ្ជាក់ថា ក្រុមការងារបច្ចេកទេសសាលារាជធានីភ្នំពេញ បានជួបប្រជុំជាមួយក្រុមការងារ JICA ដឹកនាំដោយលោក Kuroki Yasunari ដែលមកបំពេញបេសកកម្ម ស្របតាមការស្នើសុំរបស់សម្តេច ហ៊ុន សែន សម្រាប់ការសិក្សាគម្រោងដឹកជញ្ជូនដោយរថភ្លើងលើអាកាស (Phnom Penh Urban Railway Development Project)៕
