ហ្ស៊ីមបាវេ ៖ តាមសារព័ត៌មាន Telegraph របស់អង់គ្លេសចេញផ្សាយនាព្រឹកនេះថា កងកម្លាំងយោធា ជាមួយនឹងកងកម្លាំងការពារជាតិហ្ស៊ីមបាវេ (ZDF) បានប្រកាសអំពីការធ្វើរដ្ឋប្រហារយោធា នៅពេលទៀបភ្លឺឈានចូលថ្ងៃពុធ ទី១៥ ខែវិច្ឆិកា នេះដែលគេជឿជាក់ថា ជាចេតនាទម្លាក់មេដឹកនាំកាន់អំណាចយូរបំផុតនៅអាហ្វ្រិក លោក Robert Mugabe ចេញពីអំណាច។
សារព័ត៌មានដដែលរាយការណ៍ថា កងកម្លាំងយោធាជាមួយនឹងកងកម្លាំងការពារជាតិហ្ស៊ីមបាវេ (ZDF) បានធ្វើការគ្រប់គ្រងរាល់បណ្តាញសារព័ត៌មានទាំងអស់ក្នុងស្រុក។ ប៉ុន្តែខាងយោធាដែលស្មោះស្ម័គ្រនឹងមេដឹកនាំវ័យ៩៣ឆ្នាំរូបនេះ បានចេញមុខអះអាងតបវិញថា វាគ្រាន់តែជាពាក្យចចាមអារ៉ាមប៉ុណ្ណោះ ហើយមេដឹកនាំរបស់ពួកគេ គឺនៅតែកាន់អំណាច និងមានសុវត្ថិភាពដដែល។
គួរបញ្ជាក់ថា នេះគឺជាលើកដំបូងដែលប្រទេសអាហ្វ្រិកខាងត្បូងមួយនេះកំពុងមើលឃើញនូវការបែកបាក់ជាចំហរវាងយោធា និងលោក មូហ្គាបេ (Mugabe) ដែលជាមេដឹកនាំរដ្ឋវ័យចំណាស់គេនៅលើពិភពលោកដែលបានកាន់អំណាចចាប់តាំងពីទទួលបានឯករាជ្យពីក្រុមជនជាតិភាគតិចស្បែកសនៅក្នុងឆ្នាំ១៩៨០៕
