ភ្នំពេញ៖ កម្លាំងនគរបាលការិយាល័យព្រហ្មទណ្ឌកម្រិតធ្ងន់ កាលពីថ្ងៃទី១៦ ខែមីនា បានបង្ហាញមុខជនសង្ស័យ៥នាក់ ដែលកន្លងមកតែងតែបន្លំខ្លួនធ្វើជាសមត្ថកិច្ច ហើយឆ្លៀតពេលធ្វើសមត្ថកិច្ចនៅពេលយប់ ដើម្បីប្លន់យកសម្ភារ និងគំរាមជនរងគ្រោះឱ្យយកម៉ូតូទៅបញ្ចាំដើម្បីយកលុយមកឱ្យពួកគេ។
មន្ត្រីនគរបាលការិយាល័យព្រហ្មទណ្ឌកម្រិតធ្ងន់ បានថ្លែងឱ្យដឹង ថា នៅថ្ងៃទី១៣ និង១៤ ខែមីនា ឆ្នាំ ២០១៥ សមត្ថកិច្ចរបស់លោកបានឃាត់ ខ្លួនជនសង្ស័យ៥នាក់ ទី១.ឈ្មោះ វិមល ហៅជា ភេទប្រុស អាយុ៣៩ឆ្នាំ មានទីលំនៅ ផ្ទះលេខ២២២ ផ្លូវលេខ១០៧ សង្កាត់អូរឫស្សី៤ ខណ្ឌ៧មករា (ឃាត់ ខ្លួនថ្ងៃទី១៣មីនា), ទី២ឈ្មោះ ឃួន ថាវ រិទ្ធិ ហៅធី ភេទប្រុស អាយុ២៣ឆ្នាំ មាន ទីលំនៅផ្ទះលេខ៩៩ ផ្លូវលំ ភូមិក្បាល ទំនប់ សង្កាត់បឹងទំពុន ខណ្ឌ មានជ័យ ជា សន្ដិសុខភោជនីយដ្ឋានបុបា្ពជាយដែន, ទី៣.ឈ្មោះ រិទ្ធ រដ្ឋា ហៅទីទុយ០៩ ភេទ ប្រុស អាយុ២៩ឆ្នាំ ស្នាក់នៅផ្ទះលេខ៥ ផ្លូវ១៨៧ សង្កាត់ទំនប់ទឹក ខណ្ឌ ចំការមន ឃាត់ខ្លួនថ្ងៃទី១៣មីនា, ទី៤.ឈ្មោះ ប៉ែន ល័ក្ខវុឌ្ឍឺនា ហៅម៉ាប់ ភេទប្រុស អាយុ ២៣ឆ្នាំ ស្នាក់នៅសង្កាត់បឹងទំពុន ខណ្ឌ មានជ័យ មុខរបរមិនពិតប្រាកដ ឃាត់ ខ្លួនថ្ងៃទី១៤មីនា និងទី៥.ឈ្មោះ ខាត់ រិទ្ធ ហៅ៣៤ ហៅរិទ្ធ ភេទប្រុស អាយុ៤០ឆ្នាំ រស់នៅភូមិត្រញំងអង្គ ឃុំព្រៃស្លឹក ខេត្ដ តាកែវ ឃាត់ខ្លួនថ្ងៃទី១៤ ខែមីនា។
ក្នុងការឃាត់ខ្លួនជនសង្ស័យទាំង៥ នាក់នេះ សមត្ថកិច្ចរឹបអូសបានអាវុធខ្លី ០១ដើមម៉ាករ៉ូឡូ ពណ៌ស មានគ្រប់ចំនួន ១២គ្រាប់ វិទ្យុទាក់ទង ០២គ្រឿង ខ្នោះដៃ០១គ្រឿង ដំបងឆក់០១ដើម និងម៉ូតូស្គូពី០១ គ្រឿង ពាក់ស្លាកលេខ ភ្នំពេញ 1AU- 1222 ។
ប្រភពដដែល បានឱ្យដឹងទៀតថា កន្លងមកជនសង្ស័យ ទាំងអស់នេះតែងធ្វើសកម្មភាពដូចជា សមត្ថកិច្ចស្របច្បាប់ដោយជិះម៉ូតូនៅ ពេលកណ្ដាលអធ្រាត្រជួបជនរងគ្រោះ នៅពេលណា តែងកៀងជនរងទៅកន្លែង ស្ងាត់ដើម្បីប្លន់យកលុយ គ្រឿងអលង្កការ ឬម៉ូតូ។ មានពេលខ្លះពួកគេកៀបជនរងគ្រោះឱ្យយកម៉ូតូទៅបញ្ចាំនៅកុងស៊ី រួចយកលុយមកប្រគល់ឱ្យពួកគេ ដែលករណីនេះធ្វើឱ្យប្រជាពលរដ្ឋមានការភ័ន្ដច្រឡំថាពួកគេជាសមត្ថកិច្ចល្បាត ពេលយប់។ ពួកគេតែងគំរាមនាំយកទៅដាក់គុកច្រវ៉ាក់ដោយចោទថា ជិះម៉ូតូពេលយប់ដើរលក់គ្រឿងញៀនឬជិះម៉ូតូគ្មានឯកសារជាប់ក្នុងខ្លួនជាដើម។
បច្ចុប្បន្នជនសង្ស័យទាំង៥នាក់ ត្រូវបាននគរបាលព្រហ្មទណ្ឌកម្រិតធ្ងន់រាជធានីកសាងសំណុំរឿងបញ្ជូនទៅសាលាដំបូងរាជធានីភ្នំពេញធ្វើការតាមច្បាប់៕
