ភ្នំពេញ៖ លោក កឹម សុខា អនុប្រធានទី១ រដ្ឋសភា និងជាអនុ ប្រធានគណបក្សសង្គ្រោះជាតិ ដែលកំពុងស្ថិតនៅអាមេរិក បានឆ្លើយបំភ្លឺ តាមវិទ្យុអាស៊ីសេរី ផ្សាយថា កាលពីថ្ងៃទី១៥មីនា គឺលោកមិនមានប្រើពាក្យថា ផ្តួលរំលំ រដ្ឋាភិបាលទេ មានតែពាក្យថា ផ្លាស់ប្តូរ ប៉ុណ្ណោះ។
លោក កឹម សុខា បានបញ្ជាក់ថា ខ្ញុំសូមបំភ្លឺ និងជម្រាបជូនបងប្អូនជនរួមជាតិថា គឺអាចសម្តេចហ៊ុនសែន លោកទទួលរបាយការណ៍ពីណាមកច្រឡំ ឬក៏ដោយសារអ្នកព័ត៌មាន ដែលយកពាក្យពេចន៍ខ្ញុំ យកទៅនិយាយមិនពិត គឺខ្ញុំអត់មានប្រើពាក្យថា ផ្តួលរំលំរដ្ឋាភិបាល ឬគណបក្សកាន់អំណាចនោះទេ។ សូម្បីកុំថាឡើយពាក្យពេជន៍ នៅក្នុងបេះដូងខ្ញុំ នៅក្នុងគោលការណ៍របស់ខ្ញុំ ក្នុងគំនិតរបស់ខ្ញុំ ខ្ញុំមិនដែលប្រើអំពើហិង្សា មិនដែលគិតពីរឿងផ្តួលរំលំទេ។ អ្វីៗដែលខ្ញុំធ្វើ តែងតែអហិង្សា ហើយខ្ញុំតែងតែប្រឆាំងនឹងអ្នកណាដែលប្រើអំពើហិង្សា ហើយនៅពេលដែលខ្ញុំនិយាយនោះ គឺក្នុងន័យដើម្បីប្រាប់ទៅអ្នកគាំទ្រ ដែលគាត់មានការអាក់អន់ចិត្តនឹងគណបក្សសង្គ្រោះជាតិថា មិនបានមានការផ្លាស់ប្តូរសមរម្យ តាមអ្វីដែលគាត់ចង់បាន គឺផ្លាស់ប្តូរនោះ ខ្ញុំបានបញ្ជាក់ថា យើងមិនអាចធ្វើតាមរយៈបាតុកម្ម ហើយមានអំពើហិង្សាទេ ពីព្រោះគោលការណ៍គណបក្សសង្គ្រោះជាតិ គឺយើងអហិង្សា។ អីចឹងហើយ គឺយើងត្រូវងាកមករកការចរចា ហើយការចរចានេះ វាមិនបាន ១០០ ភាគរយ ដូចដែលយើងចង់ដូរនោះទេ។ គឺខ្ញុំសារភាព សារភាពត្រង់ចំណុចនឹង គឺយើងមិនអាចដូរ ដូរនឹងមានន័យថា កែការបោះឆ្នោតនឹង ឲ្យបាន ១០០ ភាគរយ ដូចអ្វីដែលយើងចង់បាន ដើម្បីឲ្យមានការផ្លាស់ប្តូរនោះទេ។ គឺអត់មាននិយាយពាក្យ ដែលផ្តួលរំលំជាដាច់ខាត។
ការលើកឡើងរបស់លោកកឹម សុខា ខាងលើនេះ បានធ្វើឡើងភ្លាមៗ ដើម្បីឆ្លើយតបនឹងលោកនាយក រដ្ឋមន្ត្រី ហ៊ុន សែន ដែលបានថ្លែងក្នុងពិធីបើកការដ្ឋានសាងសង់ផ្លូវជាតិលេខ៥៨ ពីក្រុងប៉ោយប៉ែត ទៅខេត្តឧត្តមានជ័យ កាលពីព្រឹកថ្ងៃទី១៨មីនា។
លោក ហ៊ុន សែន បានមានប្រសាសន៍ថា ឥឡូវបែរជាគេ (កឹម សុខា) ចេញមកសារភាពថា បាន ប្រឹង ប្រែងផ្តួលរំលំរាជរដ្ឋាភិបាលផ្តួល គណបក្សប្រជាជនកម្ពុជា តែមិនបានសម្រេចគេបរាជ័យ ហើយសូម ទោសប្រជាពលរដ្ឋនៅអាមេរិក…ចឹងយើង ចាត់ការតាមផ្លូវច្បាប់ បែបណាបើចោរសារភាព ហើយនោះ ។ មេចោរសារភាពហើយ ត្រូវចាត់ការផ្លូវច្បាប់យ៉ាង ណាចឹងអ្នកខូចខាត ទ្រព្យសម្បត្តិ ទាំងអម្បាល មាណ ត្រូវរក ម្នាក់ហ្នឹងទៅចាប់យកមកទារលុយទៅអាហ្នឹងត្រឹម ត្រូវហើយអត់ មានអី ខុសទេ។
លោក ហ៊ុន សែន បានថ្លែងបែបនេះ ប្រហែលជាសំដៅលើលោក កឹម សុខា អនុប្រធានរដ្ឋសភា និងជាអនុប្រធានបក្សសង្គ្រោះជាតិ ដែលបានថ្លែងថា លោកបានទទួលបរាជ័យ ក្នុងការផ្លាស់ប្តូរភ្លាមៗ និងទាំងស្រុងរដ្ឋាភិបាល ក្រោយការបោះឆ្នោតខែកក្កដា ឆ្នាំ២០១៣ នាឱកាសដែលលោកបានធ្វើទស្សនកិច្ច នៅសហរដ្ឋអាមេរិក៕
លោក កឹម សុខា អនុប្រធានទី១ រដ្ឋសភា (ឆ្វេង) និងលោកនាយករដ្ឋមន្ត្រីហ៊ុន សែន (ស្តាំ)
