ភ្នំពេញ ៖ កសិករអ្នកប្រកបរបរចិញ្ចឹមជ្រូកខ្នាតតូចនិងមធ្យមនៅក្នុងប្រទេសកម្ពុជាមានការព្រួយបារម្ភយ៉ាងខ្លាំងចំពោះតម្លៃជ្រូកដែលបានធ្លាក់ចុះយ៉ាងខ្លាំងនៅក្នុងឆ្នាំ២០១៧នេះធ្វើឱ្យពួកគាត់ប្រឈមមុខនឹងការបិទទ្វារកសិដ្ឋានជាបណ្តើរៗព្រមទាំងប្រឈមមុខនឹងបំណុលធនាគារ ដែលអាចនឹង រឹប អូសទ្រព្យសម្បត្តិផ្ទះសម្បែងរបស់ពួកគាត់នាពេលខាងមុខ។
កសិករចិញ្ចឹមជ្រូកនៅឃុំដីឥដ្ឋក្នុងស្រុកគៀនស្វាយខេត្តកណ្តាលលោកស្រីម៉ក់សុជាតិបានលើកឡើងទាំងក្តុកក្តួលរំដួលចិត្តថាការចិញ្ចឹមជ្រូករបស់គាត់នៅពេលនេះកំពុងជួបការលំបាកជា ខ្លាំង គឺពីមួយវគ្គ ទៅមួយវគ្គ លក់ខាតតម្លៃថោកមិនរួចថ្លៃដើមផង គឺ១គីឡូលក់បានតែជាង៥ពាន់ រៀល ឯថ្លៃដើមផលិតរហូតដល់ទៅជិត៧ពាន់រៀលឯណោះ។លោកស្រីថា មិនយូទៀតទេកសិដ្ឋាន ចិញ្ចឹមជ្រូករបស់គាត់នឹងត្រូវបិទទ្វារជាមិនខានប្រសិនបើគ្មានការជួយជ្រោមជ្រែងពីរាជរដ្ឋាភិបាល ក្នុងការទប់ស្កាត់ការនាំចូលជ្រូកពីបរទេស និងមិនជួយសម្រួលឱ្យតម្លៃវត្ថុធាតុដើម ក្នុងការផលិត ចំណីជ្រូកដែលកំពុងតែមានតម្លៃខ្ពស់ដូចសព្វថ្ងៃនេះទេ ម្យ៉ាងសុំឱ្យជួយតម្លៃជ្រូកអាចកើនដល់ ៨ពាន់រៀល ក្នុង១គីឡូក្រាមវិញទើបកសិករខ្មែរអាចចិញ្ចឹមបាន។
ចំណែកលោក សែម ភារ៉ា កសិករចិញ្ចឹមជ្រូកនៅស្រុកកៀនស្វាយដែរនោះបានលើកឡើងថាមិន មែនតែខ្ញុំទេ គឺកសិករចិញ្ចឹមជ្រូកស្ទើរតែទូទាំងប្រទេសកំពុងជួបបញ្ហាប្រឈមជាមួយតម្លៃជ្រូកធ្លាក់ ចុះក្នុងឡុងឆ្នាំ២០១៧នេះ ព្រោះដោយសារការនាំចូលជ្រូកពីបរទេស មានការកើនឡើង ពិសេស ការនាំចូលជ្រូកខុសច្បាប់មកពីប្រទេសវៀតណាម។
លោកអំពាវនាវឱ្យស្ថាប័នពាក់ព័ន្ធយកចិត្តទុកដាក់ចំពោះការចិញ្ចឹមសត្វរបស់កសិករខ្មែរដែលកំពុងជួបបញ្ហាប្រឈមយ៉ាងធ្ងន់ធ្ងរ តាមរយៈការកាត់បន្ថយការនាំចូលដើម្បីកម្ពស់ការចិញ្ចឹម របស់កសិករក្នុងស្រុក បើពុំនោះទេ ពួកគាត់អាចនឹងបិទទ្វារកសិដ្ឋានចោលនៅពេលដ៏ខ្លីខាងមុខ នេះជាមិនខាន ពិសេសម្នាក់ៗនឹងវ័ន្តករជាមួយបំណុលធនាគារយ៉ាងធ្ងន់ធ្ងរថែមទៀតផង។
ទាក់ទិននឹងបញ្ហានេះលោក ជេត ភិរម្យ តំណាងសមាគមអ្នកចិញ្ចឹមសត្វកម្ពុជា បានទទួល ស្គាល់ថា តម្លៃជ្រូកមានការធ្លាក់ចុះយ៉ាងគំហុក ដែលធ្វើឱ្យកសិករជួបនូវបញ្ហាខាតបង់យ៉ាងខ្លាំង ពេញមួយឆ្នាំ។លោកដើម្បីឱ្យការចិញ្ចឹមជ្រូកមានភាពប្រសើរឡើងវិញមានតែរាជរដ្ឋាភិបាលជួយធ្វើយ៉ាងកាត់បន្ថយការនាំចូលខុសច្បាប់បង្កើនប្រសិទ្ធភាពក្នុងការត្រួតពិនិត្យនៅតាមច្រកព្រំដែននិងបង់ពន្ធឱ្យបានត្រឹមត្រូវតាមច្បាប់ដែលបានកំណត់នៅក្នុងសៀវភៅបន្ទុកចំពោះសត្វដែលនាំចូលដើម្បីធានាដល់ការរក្សាតម្លៃផលិតផលក្នុងស្រុកនិងការប្រកួតប្រជែងតម្លៃក្នុងទីផ្សារ។
លោកស្រី អ៊ុក សាវិន អគ្គនាយករងនៃអគ្គនាយកដ្ឋានសុខភាពសត្វ និងផលិតកម្មសត្វបាន លើកឡើងនៅក្នុងសិក្ខាសាលាស្តីពីការវិវឌ្ឍន៍វិស័យចិញ្ចឹមសត្វនៅកម្ពុជាដែលបានប្រារពធ្វើនៅថ្ងៃទី១៥ខែធ្នូនាសាកលវិទ្យាល័យភូមិន្ទកសិកម្មថារាជរដ្ឋាភិបាលមិននៅស្ងៀមចំពោះបញ្ហាធ្លាក់ចុះនៃតម្លៃជ្រូកក្នុងស្រុកនោះទេគឺកំពុងសិក្សាពីមូលហេតុដែលនាំឱ្យកើតមានបញ្ហាតម្លៃជ្រូករស់ក្នុងស្រុកមានតម្លៃថោកឯសាច់ជ្រូកនៅតែថ្លៃដើម្បីជួយដល់អ្នកចិញ្ចឹមផងនិងការពារកុំឱ្យប៉ះពាល់ដល់អ្នកបរិភោគផង។
យ៉ាងណាលោកស្រីលើកឡើងថា ក្រសួងកសិកម្មកំពុងមានវិធានការយ៉ាងម៉ឺងម៉ាត់ទប់ ស្កាត់ការនាំចូលខុសច្បាប់ ហើយក៏មានការស្នើសុំបង្កើតច្បាប់ស្តីពីការត្រួតពិនិត្យចំពោះការ លក់ ក្រោមតម្លៃដើម មានន័យថា អ្នកលក់ក្រោមតម្លៃដើមត្រូវតែមានទោសតាមច្បាប់កំណត់។
លោកស្រីមានសុទិដ្ឋិនិយមថា តម្លៃសត្វជ្រូករបស់កសិករនឹងប្រសើរឡើងវិញក្នុងពេលខាង មុខនេះ តាមរយៈយន្តការផ្លូវច្បាប់នានាពិសេសបង្កើនសមត្ថភាពគុណភាពផលិតនិងរកវិធី សាស្ត្រ ប្រមូលវត្ថុធាតុដើមក្នុងស្រុកដើម្បីផលិតចំណីឆ្លើយតបនឹងតម្រូវការចិញ្ចឹមរបស់កសិករឱ្យបានរួមទាំងកត្តាសេវាកម្មនានាផងដែរ៕
