ខេត្តក្រចេះ៖ រថយន្ដក្រុងរបស់ក្រុមហ៊ុន វៀតណាម បើកលឿនមិនប្រយ័ត្ន បានជ្រុលទៅបុកជាមួយរថយន្ដដឹកដំឡូង បណ្តាលឲ្យ បុរសម្នាក់ជាព្រូរថយន្ត បានស្លាប់យ៉ាងរន្ធត់ និងជាង ១០នាក់ទៀត បានរងរបួសធ្ងន់ស្រាល។ករណីនេះ កើតឡើងកាលពីវេលាម៉ោង ៩និង៣០នាទី ព្រឹកថ្ងៃទី១៩ ខែមីនា ឆ្នាំ២០១៥ ស្ថិតនៅភូមិវេល ឃុំ២ធ្នូ ស្រុកស្នួល ខេត្ដក្រចេះ។
សមត្ថកិច្ច បានឲ្យដឹងថា មុនពេលកើតហេតុ រថយន្ដក្រុងដឹកអ្នកដំណើរ ជាជនជាតិវៀតណាម បានធ្វើដំណើរ ចេញពីទីរួមខេត្ដក្រចេះ លុះពេលមកដល់ ភូមិសាស្ត្រឃុំ ២ធ្នូ បានបុកជាមួយរថយន្ត ដឹកដំឡូងលាន់ដូចរន្ទះ បណ្ដាលឱ្យព្រូរថយន្ដក្រុង ជាជនជាតិវៀតណាម ស្លាប់ភ្លាមៗនៅនឹងកន្លែង រីឯអ្នកបើករថយន្ដ ដែលជាជនជាតិវៀតណាម ដូចគ្នានោះ បានរងរបួសដាច់ជើង ត្រូវបញ្ជូនទៅសង្គ្រោះ ភ្លាមៗផងដែរ។
ដោយឡែក អ្នកដំណើរដែលជិះ នៅលើរថយន្ដក្រុង ដែលស្ថិតក្នុងភាពតក់ស្លុត បានរងរបួសធ្ងន់ស្រាល ចំនួន ១១នាក់ ក៏ត្រូវបានសមត្ថកិច្ច ជួយសង្គ្រោះបឋម និងបញ្ជូនទៅកាន់ មន្ទីរពេទ្យផងដែរ។
សមត្ថកិច្ចមិនទាន់អាចបញ្ជាក់ ពីអត្តសញ្ញាណជនរងគ្រោះ នៅឡើយទេ ខណៈដែលអ្នកបើក រថយន្ដដឹកដំឡូង ដែលជាភាគីបង្ក បានរត់គេចខ្លួនបាត់ បន្សល់ទុកតែរថយន្ត ដែលខូចខាត នៅកន្លែងកើតហេតុ៕
