ភ្នំពេញ ៖ ឆ្លងតាមកិច្ចប្រជុំគណៈកម្មាធិការអចិន្ត្រៃយ៍រដ្ឋសភាក្រោមអធិបតីភាពសម្តេចអគ្គមហា ពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី១២ ខែមករានេះ រដ្ឋសភានឹងបន្តសម័យ ប្រជុំលើកទី៩ នីតិកាលទី៥ របស់ខ្លួននៅថ្ងៃទី១៥ ខែមករា ឆ្នាំ២០១៨ ដើម្បីពិភាក្សា និងអនុ ម័តសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្មក្រោម កិច្ចព្រមព្រៀងក្របខ័ណ្ឌស្តីពីកិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយរវាងសមាគមប្រជាជាតិអាស៊ី អាគ្នេយ៍ ដែលហៅកាត់ថា អាស៊ាន និងសាធារណរដ្ឋឥណ្ឌា។
ថ្លែងប្រាប់អ្នកសារព័ត៍មាននៅក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ឯកឧត្តម ឈាង វុន សមាជិកគណៈកម្មាធិការអចិន្ត្រៃយ៍នៃរដ្ឋសភាមានប្រសាសន៍ថា៖ អាស៊ាន និងឥណ្ឌាកន្លងទៅមានកិច្ចសហប្រតិបត្តិការលើផ្នែកសេដ្ឋកិច្ចជាមួយគ្នាក្នុងក្រប
ខ័ណ្ឌអាស៊ានបូក១ គឺអាស៊ានបូកឥណ្ឌា ហើយឥឡូវនេះអាស៊ានត្រូវមានច្បាប់ថ្មីមួយទៀតគឺ
ច្បាប់ស្តីពីកិច្ចព្រមព្រៀងក្របខ័ណ្ឌស្តីពីកិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយរវាង
សមាគមប្រជាជាតិអាស៊ី អាគ្នេយ៍ ដែលហៅកាត់ថា អាស៊ាន និងសាធារណរដ្ឋឥណ្ឌា ហើយខាងកម្ពុជាក្នុងនាមជាសមាជិកអាស៊ានក៏បានរៀបចំនូវសេចក្តីព្រាងច្បាប់ដាច់ដោយ
ឡែករបស់ខ្លួនមួយផងដែរស្តីពីកិច្ចសហប្រតិបត្តិការស្តីពីពាណិជ្ជកម្ម និងសេវាកម្មរវាងកម្ពុជា
និងឥណ្ឌា។
លោក ឈាង វុន បានគូសបញ្ជាក់ថា ឥណ្ឌាជាប្រទេសមានប្រជាជនច្រើន និងកំពុងមានការលូតលាស់ខ្លាំង ដែលនាំអោយទាំងអាស៊ាន ទាំងកម្ពុជា ត្រូវមានកិច្ចសហ
ប្រតិបត្តិការជាមួយឥណ្ឌាអោយបានស៊ីជម្រៅ ដើម្បីទាញយកផលប្រយោជន៍ពីគ្នាទៅវិញទៅ
មកក្នុងផ្នែកសេដ្ឋកិច្ច៕
