ភ្នំពេញ ៖ កម្ពុជាបានធ្វើជាម្ចាស់ផ្ទះ សម្រាប់កិច្ចប្រជុំមេដឹកនាំអាជីវកម្ម វ័យក្មេង លើកដំបូង មិនធ្លាប់មាននៅរាជធានីភ្នំពេញ នេះបង្ហាញពីការផ្លាស់ប្តូរមួយ ក្នុងការជួយដល់អាជីវកម្មពាក់ព័ន្ធ ក៏ដូចជាការតភ្ជាប់នូវទំនាក់ទំនង រវាងអ្នកជំនួយវ័យក្មេង ដែលទទួលបានជោគជ័យ ទៅកាន់សហគ្រិនវ័យក្មេង នៃបណ្តាប្រទេសនៅជុំវិញពិភពលោក។
កាលពីល្ងាចថ្ងៃអាទិត្យទី១៤ ខែមករានេះ នាសណ្ឋាគា សុខាភ្នំពេញ មានរៀបចំកិច្ចប្រជុំមេដឹកនាំអាជីវកម្មវ័យក្មេងមួយ ដែលមាន ប្រធាន និង សហគ្រិន ប្រហែលជាង៥០នាក់ មកពីបណ្តាប្រទេសផ្សេងៗគ្នា រួមទាំងកម្ពុជា ។ ពួកគេគឺជាតំណាងក្រុមហ៊ុន ដែលរកចំណូលបានលើសពី១៣លានដុល្លារ ដែលជាប្រាក់ចំណូលប្រចាំឆ្នាំ។
លោក Fred Mouaward ជាស្ថាបនិក និងជានាយកប្រតិបត្តិក្រុមហ៊ុន Synergia One Group ដែលមានក្រុមហ៊ុនកំពុងប្រតិបត្តិ នៅក្នុងប្រទេសចំនួន១២ និងនៅតាមឧស្សាហកម្មជាច្រើន ដែលរួមបញ្ចូលការលក់ត្បូង និងគ្រឿងអាលង្ការមានតម្លៃជាច្រើនទៀតនោះ បានលើកឡើងថា អង្គការប្រធាននាយកប្រតិបត្តិវ័យក្មេង (Young Presidents Organization ឬហៅកាត់ថា YPO) គឺជាវេទិកាសកលសម្រាប់ ប្រធាននាយកប្រតិបត្តិ ចូលរួមសិក្សាស្វែងយល់ និងទទួលបានភាពរីកចំរើនទាំងអស់គ្នា។ សមាជិកYPO ចាប់យកចំណេះដឹង ឥទ្ធិពល ការជឿទុកចិត្ត ពីអ្នកជំនួយមានឥទ្ធិពល ប្រកបដោយភាពច្នៃប្រឌិត ក្នុងពិភពលោក ដើម្បីជម្រុញឱ្យឥទ្ធិពលអាជីវកម្មផ្ទាល់ខ្លួន ក្រុមគ្រួសារ និងសហគមន៍កាន់តែជោគជ័យ។
លោកថា កម្ពុជាជាប្រទេសសេដ្ឋកិច្ចមួយ កំពុងរីកចំរើននៅអាស៊ីអាគ្នេយ៍ ដូច្នេះ ប្រធាន និងសហគ្រិនវ័យក្មេងកម្ពុជា នឹងទទួលបានអត្ថប្រយោជន៍ជាច្រើន ក្នុងការចូលរួមបេសកកម្ម YPO ហើយនឹងក្លាយជាអ្នកដឹកនាំយ៉ាងល្អពេញមួយជីវិត។
លោក ស៊ឹម ឬទ្ធី ស្ថាបនិកក្រុមហ៊ុន SIM BROTHERS ជាសមាជិក YPO និងជាស្ថាបនិក YPO Cambodia បានលើកឡើងថា YPO បានពង្រីកសក្កដានុពលសមាជិករបស់ខ្លួនជាង២៥០០០នាក់នៅក្នុង១៣០ប្រទេស ដែលមានបុគ្គលិកបំរើការជាង១៦លាននាក់ និងមានប្រាក់ចំណូលប្រចាំឆ្នាំចំនួន៦ពាន់លានដុល្លារ។ លោកថា បន្ទាប់ពីកិច្ចប្រជុំនេះ YPO Cambodia Chapter នឹងត្រូវបានបង្កើតជាផ្លូវការ ហើយត្រូវជ្រើសរើសបេក្ខជនយ៉ាងហោចណាស់១៦នាក់។
សូមបញ្ជាក់ថា កិច្ចប្រជុំមេដឹកនាំអាជីវកម្មវ័យក្មេងនេះ ប្រព្រឹត្តទៅក្រោមវត្តមានចូលរួមពី លោក សុខ ចិន្តាសោភា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ។ ហើយមេដឹកនាំ ដែលមានអាយុក្រោម៤៤ឆ្នាំ ដែលកំពុងដំណើរការក្រុមហ៊ុន មានប្រាក់ចំណូលលើសពី១៣លានដុល្លារ និងមានបុគ្គលោកយ៉ាងតិច៥០នាក់ នឹងត្រូវលើកទឹកចិត្តឱ្យដាក់ពាក្ស ធ្វើជាសមាជិក YPO៕
