រដ្ឋមន្ត្រីការបរទេស 20 រូប បានជួប្រជុំក្នុងទីក្រុង វ៉ានគូវឺ Vancouver ប្រទេស កាណាដា ក្នុងសន្និសីទដែលមាន កាណាដា និង សហរដ្ឋអាមេរិក ជាសហប្រធាន បំណងបង្ហាញនូវការរួមរួមគ្នា ប្រឆាំងនឹងមហិច្ឆតានុយក្លេអ៊ែរ និង មីស៊ីល របស់ប្រទេស កូរ៉េខាងជើង ។

ប្រទេសទាំង 20 ជាក្រុមប្រទេសដែលធ្លាប់គាំទ្រ កូរ៉េខាងត្បូង អំឡុងសម័យសង្គ្រាមកូរ៉េ បានជួបគ្នា បំណងជំរុញឲ្យអនុវត្តកាន់តែខ្លាំងថែមទៀត នូវការដាក់ទណ្ឌកម្មទៅលើប្រទេស កូរ៉េខាងជើង ដើម្បីបង្ខំឲ្យប្រទេសនេះ បោះបង់អាវុធនុយក្លេអ៊ែរ ទោះជា កូរ៉េទាំងពីរ បានធ្វើឲ្យធូរស្រាលនូវភាពតានតឹងក៏ដោយ ។

ប្រធានរៀបចំគោលនយោបាយរបស់ក្រសួងការបរទេស សហរដ្ឋអាមេរិក លោក Brian Hook និយាយថា ក្រុមរដ្ឋមន្ត្រីការបរទេសទាំង 20 ជួបគ្នាដើម្បីស្វះស្វែងរកវិធីធ្វើយ៉ាងណា បង្កើនសន្តិសុខផ្លូវសមុទ្រជុំវិញប្រទេស កូរ៉េខាងជើង ដើម្បីទប់ស្កាត់នាវាទាំងឡាយ មានទំនាក់ទំនងនឹង កូរ៉េខាងជើង ដោយដឹកជញ្ជូនទំនិញហាមប្រាម ផ្ទុយនឹងទណ្ឌកម្មអង្គការសហប្រជាជាតិ ។ ទោះយ៉ាងណា រដ្ឋមន្ត្រីការបរទេស ចិន មិនចូលរួមក្នុងកិច្ចប្រជុំនេះឡើយ ដោយរដ្ឋាភិបាលទីក្រុង ប៉េកាំង អះអាងថា ធ្វើឲ្យស្ថានភាពនៅលើឧបទ្វីបកូរ៉េ កាន់តែតានតឹង ។

ប្រទេស ចិន ដែលជាសម្ព័ន្ធមិត្តសំខាន់របស់ កូរ៉េខាងជើង និង ជាដៃគូរពាណិជ្ជកម្មធំបំផុតរបស់ប្រទេសដ៏អាថ៌កំបាំងនេះ បានបោះឆ្នោតគាំទ្រដាក់ទណ្ឌកម្ម កូរ៉េខាងជើង ប៉ុន្តែបន្តជំរុញឲ្យមានការសន្ទនារដើម្បីដោះស្រាយបញ្ហាអាវុធនុយក្លេអ៊ែរ តាមរយៈមធ្យោបាយការទូត ៕