ភ្នំពេញ ៖ កម្មកររោងចក្រម្នាក់បានរងគ្រាប់កាំភ្លើងចំនួន ២គ្រាប់បណ្តាលអោយស្លាប់ នៅពេលបញ្ជូនទៅមន្ទីរពេទ្យ ខណៈដែលកំពុងតែឈរលេងនៅលើផ្ទះជាន់ទី៣ហើយ កម្លាំងនគរបាលខណ្ឌពោធិ៍សែនជ័យ ចុះទៅបង្រាបសង្វៀនជល់មាន់ និងបាញ់អាប៉ោង ផ្ទុះអាវុធជាច្រើនគ្រាប់ ហើយគ្រាប់កាំភ្លើងបានហោះទៅត្រូវចំបំពងក ជនរងគ្រោះតែម្តង។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១១នាទីព្រឹកថ្ងៃទី២១ ខែមករា ឆ្នាំ២០១៨ នៅចំណុចខាងក្រោយផ្សារ កាណាស៊ីធី ស្ថិតនៅក្នុងភូមិចោមចៅ សង្កាត់ចោមចៅ២ ខណ្ឌពោធិ៍សែនជ័យ។បន្ទាប់ពីស្លាប់ ស្ត្រីជាប្រពន្ធបានយំសោកបោកខ្លួនហើយទាមទារឲ្យក្រុមនគរបាលទទួលខុសត្រូវ ។
ជនរងគ្រោះដែលអះអាងថាបានស្លាប់ដោយគ្រាប់កាំភ្លើង នគរបាល ឈ្មោះសៀក រ៉ន ភេទប្រុស អាយុ៣៣ឆ្នាំ ជាកម្មកររោងចក្រស្នាក់នៅកន្លែងកើតហេតុ និងមានស្រុកកំណើតនៅក្នុងឃុំដុង ស្រុកបរសេដ្ឋ ខេត្តកំពង់ស្ពឺ ត្រូវគ្រាប់កាំភ្លើងចំនួន ២គ្រាប់ចំបំពង់ក ធ្លាយមួយគ្រាប់ និងបៀមមួយគ្រាប់។ ជនរងគ្រោះមានប្រពន្ធឈ្មោះ នុប ផាន្នី អាយុ២៧ឆ្នាំ មុខរបរកម្មការិនីរោងចក្រកាត់ដេរមានកូនប្រុសម្នាក់ និងកូនស្រីម្នាក់នៅក្នុងបន្ទុក។
តាមព័ត៌មានអោយដឹង ថា នៅមុនពេលកើតហេតុកម្លាំងនគរបាលក៍បានចុះទៅបង្ក្រាបសង្វៀនជល់មាន់មួយកន្លែងនៅក្នុងភូមិ កើតហេតុក៍បានផ្ទុះអាវុធជាច្រើនគ្រាប់គំរាមឡើងលើ ហើយក្រុមអ្នកញៀនល្បែងបាននាំគ្នារត់ប្រសាច ចៃដន្យគ្រាប់កាំភ្លើងហោះទៅត្រូវជនរងគ្រោះដែលកំពុងតែឈរនៅលើផ្ទះជាន់ទី៣។
តាមស្ត្រីជាប្រពន្ធបុរសរងគ្រោះបានអោយដឹងថា បន្ទាប់ត្រឡប់មកពីផ្សារ ប្តីរបស់ខ្លួនបានទៅឈរនៅយ៉ខាងមុខផ្ទះជាន់ទី៣ មុខបន្ទប់ប្អូន ស្រាប់តែឮស្នូរផ្ទុះអាវុធជាច្រើនគ្រាប់។ ភ្លាមៗនោះ ស្រាប់តែឃើញប្តីរបស់ខ្លួនបានបានទៅដួលតែម្តង។
តាមព័ត៌មានអោយដឹងថា ក្រុមអ្នកញៀនល្បែងភ្នាល់មាន់ចំនួន២នាក់ត្រូវបានឃាត់ខ្លួន សមត្ថកិច្ចដកហូតបានមាន់៦ក្បាល ទ្រុង និងកៅអីមួយចំនួន ។
តាមព័ត៌មានអោយដឹងថា ខណៈនោះ បង្កអោយមានការភ្ញាក់ផ្អើលជាថ្មីបន្ថែមទៀត ហើយកម្លាំងនគរបាលក៍បាននាំជនរងគ្រោះបញ្ជូនទៅកាន់មន្ទីរពេទ្យ ព្រះកុសុមៈ នៅពេលទៅដល់មន្ទីរពេទ្យ ក៍បានដាច់ខ្យល់ស្លាប់ ។សពជនរងគ្រោះត្រូវបានក្រុមគ្រួសារបញ្ជូនមកតម្កល់ធ្វើបុណ្យនៅវត្តពោធិ៍តុងក្រោយមកបញ្ជូនទៅស្រុកកំណើត។
តាមព័ត៌មានអោយដឹងថា បន្ទាប់ពីផ្ទុះអាវុធបណ្តាលអោយមនុស្សស្លាប់ សមត្ថកិច្ចជំនាញចុះទៅពិនិត្យ កន្លែងកើតហេតុ រើសបានសំបកគ្រាប់កាំភ្លើងខ្លី ចំនួន ៤គ្រាប់ ។ចំណែកកម្លាំងនគរបាលដែលចុះទៅបង្ក្រាប មានគ្នា ៦នាក់មានកាំភ្លើងខ្លីចំនួន៥ដើម ត្រូវបានឃាត់ខ្លួននៅអធិការដ្ឋាន ខណ្ឌផងដែរ ៕
