ភ្នំពេញ ៖ វិយោគិនកំពុងសម្លឹងមើលការវិនិយោគលើសម្ភារៈបន្ទប់គេងទំនើបៗនៅក្នុងប្រទេសកម្ពុជា ដោយសារវិស័យសំណង់លំនៅដ្ឋានមានការរីកចម្រើនខ្លាំង ។
ដោយមើលឃើញពីសក្ដានុពលទីផ្សារ នៃសម្ភារៈបន្ទប់គេ នៅក្នុងប្រទេសកម្ពុជា ខណៈ ការរីកដុះដាលនៃសំណង់អគារខ្ពស់ៗ សណ្ឋាគារ និងលំនៅឋានថ្មីៗ បានកើនឡើងជាបន្តបន្ទាប់នោះ អ្នកវិនិយោគក្នុងស្រុកជាច្រើន បានសហការជាមួយនិងក្រុមហ៊ុនបរទេស ដើម្បីនាំចូលនិងចែកចាយផលិតផលបន្ទប់គេង ដែលមានគុណភាព ចូលមកក្នុងទីផ្សារកម្ពុជា ។ ការរីកចម្រើននៃការនាំចូលផលិតផលទាំងនោះមកកម្ពុជា គឺដោយសារ កំណើនសេដ្ឋកិច្ច និងប្រាក់ចំណូលពលរដ្ឋ បានកើនឡើងជាបន្តបន្ទាប់។ លោក Aloysius Chew អ្នកចាត់ការទូទៅនៃក្រុមហ៊ុនស៊ីមម៉ុន ( Simmons ) ដែលជាក្រុមហ៊ុនលក់ផលិតផលដំណេក បានអោយដឹងថា លោកមើលឃើញពីណើនសេដ្ឋកិច្ចនិងទីផ្សារអចលនទ្រព្យនៅកម្ពុជានាពេលថ្មីៗនេះកំពុងមានសន្ទុះកើនឡើងខ្ពស់ ដែលជាហេតុធ្វើអោយក្រុមហ៊ុនផ្គត់ផ្គង់សម្ភារៈដំណេក សម្រេចវិនិយោគនៅក្នុងប្រទេសកម្ពុជាផ្ទាល់តែម្ដង ។
លោកថា បើតាមទស្សនវិស័យរបស់ធនាគារអភិវឌ្ឍន៍អាស៊ីបានការព្យាករណ៍ពីកំណើនសេដ្ឋកិច្ចកម្ពុជានៅតែរឹងមាំ ជាមួយការកើនឡើងប្រាក់ចំណូលរបស់ប្រជាជនកម្ពុជាក៏កាន់តែខ្ពស់ពីមួយឆ្នាំទៅមួយឆ្នាំ ។ ដូចនេះ តម្រូវការលើសម្ភារៈទំនើប និងមានគុណភាពក៏កើនឡើងទៅតាមនឹងប្រាក់ចំណូលនោះដែរ។
លោកបញ្ជាក់ថា ស្ថិរភាពនៅក្នុងប្រទេសកម្ពុជាបានញ៉ាំងឱ្យមានការអភិវឌ្ឍពីមួយថ្ងៃទៅមួយថ្ងៃបូករួមជាមួយជីវភាពរស់នៅរបស់ប្រជាជនកម្ពុជាកាន់តែល្អប្រសើរឡើង ហេតុដូច្នេះហើយ មនុស្សកាន់តែច្រើនកំពុងផ្តោតលើរបៀបរស់នៅនិងការគេងដែលមានសុខភាពល្អ ព្រោះដំណេកល្អនិងស្រួល មានសារៈសំខាន់ណាស់សម្រាប់សុខភាព ។
តាមរយៈក្រុមហ៊ុនស៊ីមម៉ុន (Simmons) បង្ហាញថា បច្ចុប្បន្នមានសណ្ឋាគារទំនើបៗមួយចំនួន ក្នុងប្រទេសកម្ពុជា កំពុងប្រើប្រាស់ផលិតផលរបស់ស៊ីមម៉ុនស៍ ជាក់ស្ដែង សណ្ឋាគារ Rosewood Phnom Penh និងសណ្ឋាគារអាំងទែកង់ទីណង់តាល់រាជធានីភ្នំពេញជាដើម។
សូមបញ្ជាក់ថា តាមរបាយការណ៍របស់សាលារាជធានីភ្នំពេញ គិតត្រឹមឆ្នាំ ២០១៧កន្លងទៅថ្មីៗនេះ រាជធានីភ្នំពេញមានអគារខ្ពស់ចំនួន ៩៧៩អគារ ក្នុងនោះ អគារកម្ពស់៥ជាន់ដល់ ៩ជាន់ មាន៥៧៩អគារ! អគារកម្ពស់១០ជាន់ ដល់១៩ជាន់ មាន២៩០អគារ! អគារកម្ពស់២០ជាន់ដល់២៩ជាន់ មាន៧០អគារ! អគារកម្ពស់៣០ជាន់ដល់៣៩ជាន់ មាន២៩ជាន់ និងអគារកម្ពស់ចាប់ពី៤០ជាន់ឡើងទៅ មានចំនួន១១អគារ។
ចំណែក សំណង់បុរីដែលសាលារាជធានីភ្នំពេញ បានអនុញ្ញាតអោយសាងសង់មានចំនួន១៨០បុរី ៕
