ភ្នំពេញ ៖ ព្រឹទ្ធិសភាកម្ពុជា បានឯកភាពទាំងស្រុងលើសេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀងពាណិជ្ជកម្ម សេវាកម្មក្រោមកិច្ចព្រមព្រៀងក្របខ័ណ្ឌស្តីពី កិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយ រវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា។
ក្រោយកិច្ចប្រជុំពេញអង្គព្រឹទ្ធសភា នាព្រឹកថ្ងៃទី២៣ខែមករា ដែលដឹកនាំដោយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ហើយមានលោក ប៉ាន សូរស័ក្តិជាអ្នកការពារសេចក្តីព្រាងច្បាប់នេះ លោក ម៉ម ប៊ុន នាង អ្នកនាំពាក្យព្រឹទ្ធសភាបានប្រាប់អ្នកសារព័ត៌មានថា អង្គប្រជុំព្រឹទ្ធសភា បានពិនិត្យ និងឲ្យយោបល់ឯកភាពទាំងស្រុងលើសេចក្តីព្រាងច្បាប់ទាំងមូល ដោយឥតកែប្រែចំនួន៤៩សំឡេង នៃចំនួនសមាជិកព្រឹទ្ធសភាទាំងមូល។
អ្នកនាំពាក្សរូបនេះបញ្ជាក់ថាសេចក្តីព្រាងច្បាប់នេះ នឹងផ្តល់ផលប្រយោជន៍ដល់ព្រះរាជាណាចក្រកម្ពុជា តាមរយៈការផ្តល់លក្ខណៈអនុគ្រោះចំពោះបណ្តាប្រទេសសមាជិកអាស៊ាន ដែលជាប្រទេសអភិវឌ្ឍន៍តិចតួច ក្នុងការទទួលបានការបើកច្រកទីផ្សារថ្មីបន្ថែមទៀតពីឥណ្ឌា និងជាទីផ្សារថ្មីមួយបន្ថែមទៀតក្នុងការជំរុញកំណើនសេដ្ឋកិច្ចកម្ពុជា តាមរយៈការធ្វើពាណិជ្ជកម្មជាមួយនឹងឥណ្ឌា ដែលជាប្រទេសមានសក្តានុពលផ្នែកសេដ្ឋកិច្ចដ៏ធំ។
សូមបញ្ជាក់ថា សេចក្តីព្រាងច្បាប់នេះ តាក់តែងឡើងមាន ៣មាត្រា ត្រូវបានរដ្ឋសភានៃព្រះរាជាណាចក្រកម្ពុជាអនុម័តយល់ព្រមចំនួន១១៣សំឡេង នៃចំនួនសមាជិកសភាទាំងមូល កាលពីថ្ងៃទី១៥ ខែមករា ឆ្នាំ២០១៨ ក្នុងសម័យប្រជុំពេញអង្គ រដ្ឋសភាលើកទី៩ នីតិកាលទី៥៕
