ភ្នំពេញ ៖ មូលនិធិអារ៉ាប់ប៊ីសាអូឌីត កំពុងពិនិត្យលើការផ្តល់ជំនួយហិរញ្ញប្បទានសម្រាប់ វិស័យមួយ ចំនួនដល់ប្រទេសកម្ពុជា ដែលធ្វើអោយកម្ពុជាក្លាយជាប្រទេសគោលដៅលេខរៀងទី៨៣ ក្នុងបេសកកម្ម នៃការផ្តល់ជំនួយហិរញ្ញប្បទានរបស់មូលនិធិមួយនេះ ដោយផ្តោតទៅលើការកសាងហេដ្ឋា រចនាសម្ព័ន្ធនានា ដូចជា៖ផ្លូវថ្នល់ មន្ទីរពេទ្យ សាលារៀន សំណង់អគារផ្សេងៗ និងបរិក្ខាប្រើប្រាស់ចាំបាច់នានា។ នេះបើ តាមការបញ្ជាក់ជូនលោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ ដោយលោកយូសុះ អ៊ីប្រាហ៊ីម អាល់ប៉ាស្សាម អគ្គនាយក មូលនិធិអារ៉ាប់ប៊ីសាអូឌីត ក្នុងជំនួបពិក្សាការងារនៅវិមានសន្តិភាព នាព្រឹកថ្ងៃទី២៥ ខែមករានេះ។
លោក យូសុះ អ៊ីប្រាហ៊ីម អាល់ប៉ាស្សាម មានប្រសាសន៍ថា មូលនិធិអារ៉ាប់ប៊ីសាអូឌីត បានបង្កើតឡើង កាលពីឆ្នាំ១៩៧៤ និងបានដំណើរការពេញលេញក្នុងឆ្នាំ១៩៧៥ ដែលផ្តើមដោយថវិកាជំហានដំបូង ប្រមាណ៣១ពាន់លានរីយ៉ាល ប្រមាណជាង៨ពាន់លានដុល្លារអាមេរិក។ លោកថា មូលនិធិមួយនេះ បង្កើតឡើងក្នុងគោលបំណងរួមចំណែកផ្តល់ហិរញ្ញប្បទាន ទៅលើគម្រោងអភិវឌ្ឍន៍នៅតាមបណ្តា ប្រទេសកំពុងអភិវឌ្ឍន៍ តាមរយៈជំនួយបច្ចេកទេស ដែលមកដោយបច្ចុប្បន្ននេះមូលនិធិបានផ្តល់ជំនួ យហិរញ្ញប្បទានទៅអោយប្រទេសចំនួន៨២ប្រទេសរួចហើយ។ ចំណែកប្រទេសកម្ពុជាគឺជាប្រទេស គោលដៅទី៨៣ នៃការផ្តល់ជំនួយហិរញ្ញប្បទាននេះក្នុងអត្រាការប្រាក់២%។
ប្រធានមូលនិធិអារ៉ាប់ប៊ីសាអូឌីតរូបនេះបានសម្តែងការកោតសសើរចំពោះរាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោនាយករដ្ឋមន្ត្រីដែលបានខិតខំប្រឹងប្រែងក្នុងការអភិវឌ្ឍន៍ប្រទេសជាតិប្រកបដោយថាមភាព រក្សាបាននូវកំណើនសេដ្ឋកិច្ចប្រចាំឆ្នាំខ្ពស់ និងអាចកាត់បន្ថយភាពក្រីក្រ របស់ប្រជាពលរដ្ឋបានយ៉ាងឆាប់រហ័ស។
លោក អូស្មាន ហាស្សាន់ បានថ្លែងអំណរគុណចំពោះការចាប់អារម្មណ៍ របស់មូលអារ៉ាប់ប៊ី សាអូឌីតមកលើប្រទេសកម្ពុជា ក្នុងការផ្តល់ជំនួយហិរញ្ញប្បទានសម្រាប់ការអភិវឌ្ឍន៍ ដែលធ្វើអោយ កម្ពុជាក្លាយជាប្រទេសលេខរៀងទី ៨៣ក្នុងការទទួលជំនួយនេះ។
សូមជម្រាបជូនថាបណ្តាប្រទេសអាស៊ានចំនួន៦ ទទួលបាននូវជំនួយហិរញ្ញប្បទាន ពីមូលអារ៉ាប់ប៊ីសា អូឌីត មានទំហំទឹកប្រាក់សរុបប្រមាណ៥៧៧លានដុល្លារអាមេរិករួមមាន៖ ឥណ្ឌូនេស៊ីជាង២៩៧លានដុល្លារ,វៀតណាមជាង១១៣លានដុល្លារ,ម៉ាឡេស៊ីជាង១០០លានដុល្លារ,ថៃជាង៤៦លានដុល្លារ,ហ្វីលីពីនជាង២០លានដុល្លារ,និងមីយ៉ាន់ម៉ាជាង៨០ម៉ឺនដុល្លារអាមេរិក៕
