បន្ទាយមានជ័យ ៖នៅថ្ងៃទី២៥ ខែមករា ឆ្នាំ២០១៨ នេះ ស្ថិតត្រង់ចំណុចអូរទឹកមួយកន្លែង ក្នុងភូមិប្ញស្សផី សង្កាត់ផ្សារកណ្តាល ក្រុងប៉ោយប៉ែត ខណៈគេបានឃើញបុរសម្នាក់ដាំក្បាលចូលក្នុងទឹកស្លាប់ រួមទាំងម៉ូតូ ១គ្រឿង ។
ជនរងគ្រោះដែលស្លាប់ខាងលើមានឈ្មោះ ស្រឹម ស្រេង អាយុ ៣៣ឆ្នាំ ជាកម្មករសំណង់ មានស្រុកកំណើតនៅខេត្តកំពង់ចាម និងមានប្រពន្ធឈ្មោះ ឆោម សុខនី អាយុ ៣៤ឆ្នាំ ទាំង ២នាក់ មានកូនស្រី១ កំពុងរស់នៅឯរាជធានីភ្នំពេញ ។
ពួកគេទាំង ២នាក់ ទើបមកពីរាជធានីភ្នំពេញ មកធ្វើជាកម្មករសំណង់នៅក្រុងប៉ោយប៉ែត បានរយៈពេល ១០ថ្ងៃ ប៉ុណ្ណោះ ។ លុះនៅវេលាម៉ោង ៨យប់ ថ្ងៃទី២៤ មករា ប្តីខ្លួន (ជនរងគ្រោះដែលស្លាប់) បានចេញទៅផឹកស្រាជាមួយក្រុមកម្មករ ក្រោយមកខ្លួនបានទៅតាមរកប្តីឃើញកំពុងហូបស្រា ក៏ផ្ទុះកំហឹង និងទាញមែកប្ញស្សីវាយទៅលើប្តី បន្ទាប់មកប្តីខ្លួនបានងើបពីកន្លែងផឹកទាញម៉ូតូជិះចេញទៅទាំងកម្រោល ។
ស្ត្រីជាប្រពន្ធបន្តថា ខ្លួនមិនបានដឹងប្តីជិះម៉ូតូជួបគ្រោះថ្នាក់នោះទេ តែភ្លាមៗ ខ្លួនបានតាមរកប្តីដែរ តែរកមិនឃើញ ។ លុះនៅវេលាម៉ោង ៥ព្រឹកនេះ មានគេប្រទះឃើញសាកសពមនុស្សនៅកន្លែងកើតហេតុ ទើបខ្លួនរត់មកមើល ទើបដឹងថា អ្នកស្លាប់ជាប្តីរបស់ខ្លួនទៅវិញ ៕ សុផល
