ខេត្តប៉ៃលិន៖ ស្របពេលដែលមានការដួលសន្លប់ របស់សិស្សានុសិស្សជាច្រើននាក់ នៅអនុវិទ្យាល័យសន្តិភាព ព្រមទាំងការពិនិត្យ និងព្យាបាលរបស់គ្រូពេទ្យជំនាញ រកមិនឃើញពីមូលហេតុ នៃការដួលសន្លប់នោះ អាជ្ញាធរឃុំស្ទឹងកាច់ និងលោកគ្រូ អ្នកគ្រូ ដែលមានជំនឿរលើខ្មោចព្រាយបីសាយ បានរៀបចំពិធីសែនព្រេន ព្រមទាំងដាក់ព្រះភូមិ ដើម្បីសុំសេចក្តីសុខ ក្នុងសាលារៀន នាព្រឹកថ្ងៃទី៨ ខែកុម្ភៈ ឆ្នាំ២០១៨ ស្ថិតក្នុងបរិវេណសាលាអនុវិទ្យាល័យសន្តិភាព ក្នុងភូមិដូង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បើតាមលោក កង ថេង មេឃុំស្ទឹងកាច់ ស្រុកសាលាក្រៅ ដែលចូលរួមក្នុងកម្មវិធីខាងលើ បានមានប្រសាសន៍ឲ្យភ្នាក់ងារយើងដឹងថា៖ ដោយសារតែមានជំនឿរលើអារ័ក្សអ្នកតា ព្រមទាំងលឺសិស្សសាលានិយាយតៗគ្នា ថាមានខ្មោចព្រាយបីសាយនៅក្នុងសាលា ដែលបង្កឲ្យមានការដួលសន្លបរបស់សិស្សនោះ អាជ្ញាធរឃុំ និងលោកនាយកសាលា ព្រមព្រៀងគ្នា រៀបចំពិធីសែនព្រេន ព្រមទាំងដំឡើងព្រះភូមិ ក្នុងបរិវេណសាលា ដើម្បីសុំសេចក្តីសុខចំរើន ដល់សិស្សានុសិស្ស ដែលសិក្សានៅទីនេះ ។ លោក បានបន្តថា៖ បើតាមការប្រាប់ពីពលរដ្ឋជុំវិញសាលានិយាយប្រាប់លោកថា ការសាងសង់សាលាថ្មី នៅក្នុងបរិវេណសាលាចាស់ មុននិងធ្វើគឺពុំមានការរៀបចំសែនព្រេន សុំសេចក្តីសុខឡើយ ហើយប្រការនេះប្រហែលជាធ្វើលើផ្ទះ ដែលគេ(ខ្មោចព្រាយបីសាយ)រស់នៅ ។ ប៉ុន្តែប្រការខាងលើនេះ លោកមិនសូវមានជំនឿរនោះទេ លោកគិតថា ប្រហែលមកពីមានការលក់របស់របរ ប៉ះពាល់សុខភាពណាមួយ ។ ជាមួយគ្នានេះដែល លោកបានបញ្ជាក់ថា ក្រោយពីរៀបចំពិធីសែនព្រេន ដាក់ព្រះភូមិឲ្យគេ(ខ្មោច)ហើយ នៅថ្ងៃទី៩ ខែកុម្ភៈ សិស្សានុសិស្ស និងមកចូលរៀនជាធម្មតាវិញ ហើយចំមើល តើមានអ្វីកើតឡើងនៅទីនោះទៀត ។
សូមបញ្ជាក់ថា៖ កាលពីថ្ងៃទី៦ ទី៧ ខែកុម្ភៈ កន្លងទៅ សិស្សានុសិស្សនៃសាលាអនុវិទ្យាល័យសន្តិភាព ស្ថិតក្នុងឃុំស្ទឹងកាច់ ស្រុកសាលាក្រៅ មានការដួលសន្លប់ ដោយមិនដឹងមូលហេតុ រហូតមកដល់ថ្ងៃនេះ ដែលពលរដ្ឋនៅតំបន់នេះសង្ស័យថា មានខ្មោចព្រាយបីសាយ មកលងបន្លាចពួកគេ(សិស្ស)នៅក្នុងបរិវេណសាលា រហូតដល់នាយកសាលាសម្រេចផ្អាក់ការសិក្សា របស់សិស្សរយៈពេល២ ទៅ៣ថ្ងៃផងដែរ ៕
